’ یہ محض ٹریلر تھا ‘پوری تصویر دنیا کو دکھائیں گے‘

’پاکستان میں موجود جوہری ہتھیار دہشت گردوں کے ہاتھوں لگنے کے امکان کو مسترد نہیں کیا جا سکتا ہے ‘
بھج/گجرات//
وزیرِ دفاع‘ راج ناتھ سنگھ نے گجرات کی بھج ایئر بیس کے دورے کے دوران کہا ہے ’ ’آپریشن سندور ابھی ختم نہیں ہوا، جو کچھ ہوا صرف ایک ٹریلر تھا، صحیح وقت آنے پر ہم پوری تصویر دنیا کو دکھائیں گے‘‘۔
وزیر دفاع نے کہا’’آپ لوگوں نے آپریشن سندور میں واقعی ایک معجزاتی کام کیا ہے۔ آپ نے پوری دنیا میں انڈیا کا سر فخر سے بلند کیا ہے‘‘۔
وزیر دفاع نے کہا ’’آپریشن سندور کا نام وزیر اعظم نریندر مودی نے دیا ہے۔ اب یہ واضح ہو گیا ہے کہ دہشت گردی اور حکومت پاکستان کا گہرا تعلق ہے، اس صورت حال میں اگر جوہری ہتھیار وہاں موجود ہیں تو ان کے دہشت گرد عناصر کے ہاتھ لگنے کے امکان کو رد نہیں کیا جا سکتا‘‘۔
سنگھ نے کہا ’ ’یہ نہ صرف بھارت بلکہ پوری دنیا اور پاکستان کے عام لوگوں کیلئے بھی ایک سنگین خطرہ ہو گا‘‘۔انھوں نے کہا ’’یہ بھج ۱۹۶۵؍اور۱۹۷۱ کی جنگوں میں ہماری جیت کا گواہ رہا ہے‘‘۔
وزیر دفاع نے بین الاقوامی مالیاتی فنڈ (آئی ایم ایف) سے مطالبہ کیا کہ وہ پاکستان کو دی جانے والی ایک ارب ڈالر کی امداد پر نظر ثانی کرے۔
سنگھ نے کہا کہ ہندوستان نہیں چاہتا کہ آئی ایم ایف کو دی جانے والی فنڈنگ کو براہ راست یا بالواسطہ طور پر پاکستان یا کسی دوسرے ملک میں دہشت گردی کے بنیادی ڈھانچے کی تعمیر کیلئے استعمال کیا جائے۔
وزیر دفاع نے کہا کہ میرا ماننا ہے کہ آج کے دور میں پاکستان کو کسی بھی قسم کی مالی امداد دہشت گردی کی مالی معاونت سے کم نہیں ہے۔
سنگھ نے کہا کہ بھارت چاہتا ہے کہ آئی ایم ایف پاکستان کو دی جانے والی ایک ارب ڈالر کی امداد پر نظر ثانی کرے اور مستقبل میں کسی بھی قسم کی امداد دینے سے گریز کرے۔
وزیر دفاع نے کہا کہ آپریشن سندور میں ہندوستان کی مسلح افواج نے نہ صرف دشمن پر غلبہ حاصل کیا بلکہ انہیں شکست دینے میں بھی کامیابی حاصل کی۔
بھارتی فضائیہ کی تعریف کرتے ہوئے کہ انہوں نے مؤثر طریقے سے دہشت گردی کے خلاف مہم کی قیادت کی، انہوں نے کہا۔ ان کاکہنا تھا’’ہمارا فضائیہ اپنے بہادری، ہمت اور شان کے ساتھ نئے اور بڑے عروج پر پہنچ گیا ہے‘‘۔
سنگھ آج صبح بجھ فضائیہ اسٹیشن پہنچے تاکہ مجموعی سکیورٹی صورت حال کا جائزہ لے سکیں۔یہاں فضائیہ کا اڈہ ان فوجی بنیادی ڈھانچوں میں سے ایک تھا جنہیں پاکستان نے دونوں فوجوں کے درمیان چار روزہ تصادم کے دوران نشانہ بنانے کی کوشش کی تھی۔
دریں اثنا بھارت کے وزیر خارجہ جے شنکر نے دعویٰ کیا ہے کہ ’آپریشن سیندور سے دہشت گردوں کے ٹھکانے تباہ کر کے ہم نے اپنا ہدف کامیابی سے حاصل کیا ہے،انڈیا امریکہ تجارتی معاہدے سے اچھی امید ہے۔‘
وزیر خارجہ کا ایک کلپ سوشل میڈیا پر وائرل ہے جس میں ان کو صحافیوں سے بات چیت کے دوران پاکستان کے خلاف حملوں میں کامیابی کا دعویٰ کرتے سنا جا رہا ہے۔
ویڈیو کلپ میں وہ کہہ رہے ہیں کہ ’ہم نے پاکستان میں مظفر آباد، بہاولپور مریدکے سمیت دیگر مقامات پر دہشت گردوں کے خلاف آپریشن کر کے ان کے ٹھکانے تباہ کیے تو یہ ہماری کامیابی ہے۔‘
وہ کہتے ہیں ’ ’ہم نے پاکستانی حکومت کو آگاہ کیا تھا کہ ہم دہشت گردوں کے ٹھکانے کو نشانہ بنانے آنے لگے ہیں اورہمارا مقصد ملٹری کو نشانہ بنانا نہیں ہے تو ان کے پاس آپشن ہے کہ وہ اس مداخلت نہ کریں۔ تاہم انھوں نے اس کو قبول نہ کیا۔‘‘
جے شنکر نے کہا کہ ’سیٹلائیٹ تصاویر سے پتا چل جاتا ہے کہ ہم نے ان پر کتنا کامیاب حملہ کیا اور انھی سیٹلائیٹ تصاویر سے پتا چلتا ہے کہ انھوں(پاکستانی فوج) نے ہمارا کتنا کم نقصان کیا۔‘‘