پی سی بی نے بنگلہ دیش کرکٹ ٹیم کے خلاف دو اضافی مینز ٹی ٹوئنٹی انٹرنیشنل میچوں کی تصدیق کردی

لاہور//پاکستان کرکٹ بورڈ نے تصدیق کی ہے کہ بنگلہ دیش کی مینز کرکٹ ٹیم مئی میں پانچ میچوں کی ٹی ٹوئنٹی سیریز کیلئے پاکستان کا دورہ کرے گی۔ یہ سیریز فیوچر ٹور پروگرام ( ایف ٹی پی ) کا حصہ ہے جو دراصل تین ون ڈے اور تین ٹی ٹوئنٹی انٹر نیشنل میچوں پر مشتمل تھی تاہم آئندہ سال آئی سی سی مینز ٹی ٹوئنٹی ورلڈ کپ کے پیش نظر دونوں کرکٹ بورڈز نے باہمی طور پر ون ڈے میچوں کی جگہ دو اضافی ٹی ٹوئنٹی انٹرنیشنل کھیلنے پر اتفاق کیا ہے۔
پانچ میچوں کی ٹی ٹوئنٹی سیریز 25 مئی سے 3 جون تک فیصل آباد اور لاہور میں کھیلی جائے گی۔ فیصل آباد کا اقبال اسٹیڈیم جس نے گزشتہ سال ستمبر میں افتتاحی چیمپئنز ون ڈے کپ اور گزشتہ ماہ نیشنل ٹی ٹوئنٹی کپ کی کامیابی کے ساتھ میزبانی کی، سیریز کے پہلے اور دوسرے ٹی ٹوئنٹی کی میزبانی بالترتیب 25 اور 27 مئی کو کرے گا۔
اقبال اسٹیڈیم فیصل آباد جو اس سے قبل 1978 سے 2008 کے درمیان 24 ٹیسٹ اور 16 ون ڈے میچوں کی میزبانی کر چکا ہے، 17 سال کے وقفے کے بعد بین الاقوامی کرکٹ کی واپسی کو خوش آمدید کہے گا۔
اس اسٹیڈیم میں آخری بین الاقوامی میچ اپریل 2008 میں بنگلہ دیش اور پاکستان کے درمیان ون ڈے انٹرنیشنل میچ تھا۔لاہور کا قذافی اسٹیڈیم 30 مئی، یکم جون اور 3 جون کو بقیہ تین ٹی ٹوئنٹی میچوں کی میزبانی کرے گا۔ بنگلہ دیشی ٹیم 21 مئی کو پاکستان پہنچے گی اور 22 سے 24 مئی تک اقبال اسٹیڈیم میں تربیتی سیشن کرے گی۔پاکستان بنگلہ دیش سیریز کا شیڈول بھی جاری کر دیا گیا( سیریز کے پانچوں میچز رات 8 بجے شروع ہوں گی) ۔
شیڈول کے مطابق 21 مئی کوبنگلہ دیش کی ٹیم پاکستان پہنچے گی ۔25 مئی کو پہلا ٹی ٹوئنٹی انٹرنیشنل میچ اقبال اسٹیڈیم فیصل آباد میں کھیلا جائیگا ۔27 مئی کودوسرا ٹی ٹوئنٹی انٹرنیشنل میچ اقبال اسٹیڈیم فیصل آباد میں کھیلا جائیگا ۔30 مئی کوتیسرا ٹی ٹوئنٹی انٹرنیشنل میچ قذافی اسٹیڈیم لاہور میں کھیلا جائیگا ۔ یکم جون کوچوتھا ٹی ٹوئنٹی انٹرنیشنل میچ قذافی اسٹیڈیم لاہور میں کھیلا جائیگا 3 جون کو پانچواں ٹی ٹوئنٹی انٹرنیشنل میچ قذافی اسٹیڈیم لاہور میں کھیلا جائیگا ۔