اگنی پتھ :کٹھوعہ میں ممکنہ امیدواروں کی شاہراہ پر دھرنا دینے کی کوشش ناکام

کٹھوعہ/نئی دہلی//
پولیس نے ہفتہ کو جموں و کشمیر کے کٹھوعہ ضلع میں جموں،پٹھانکوٹ ہائی وے کو روکنے کی فوج کی اعلان کردہ ’اگنی پتھ‘ اسکیم میں بھرتی ہونے کے خواہشمندوں کی کوشش کو ناکام بنا دیا۔
اہلکاروں نے بتایا کہ نوجوانوں کے ایک گروپ، جو پہلے ہی جسمانی اور طبی ٹیسٹ پاس کر چکے ہیں اور پچھلے کچھ سالوں سے فوج میں شمولیت کیلئے اپنے تحریری امتحان کا انتظار کر رہے تھے‘ نے کٹھوعہ ضلع کے چڈوال میں نئی بھرتی پالیسی کے خلاف مظاہرہ کیا۔
اہلکاروں نے کہا کہ مظاہرین نے، اسکیم اور بی جے پی کے خلاف نعرے لگاتے ہوئے، جموں،پٹھانکوٹ ہائی وے کو روکنے کی کوشش کی لیکن پولیس نے ان کی کوشش کو ناکام بنا دیا جس نے مظاہرین کو بھگانے کیلئے ہلکا لاٹھی چارج کیا، جن میں سے کچھ نے جوابی کارروائی میں پتھراؤ کیا۔
حکام نے بتایا کہ اضافی فورسز کو جائے وقوعہ پر روانہ کیا گیا ہے اور علاقے میں صورتحال اچھی طرح سے قابو میں ہے۔ انہوں نے مزید کہا کہ’معمولی‘ پتھراؤ کے واقعے میں کوئی زخمی نہیں ہوا۔
اس دوران وزارت دفاع نے اگنی ویروں کیلئے ۱۰فیصد عہدہ ریزرو کرنے کا اعلان کیا ہے ۔
وزیر دفاع راج ناتھ سنگھ نے ہفتہ کو اس سلسلے میں وزارت کی تجویز کو منظوری دی۔ یہ۱۰فیصد ریزرویشن کوسٹ گارڈ، ڈیفنس سیکٹر کے۱۶پی ایس یو اور ڈیفنس سول ڈپارٹمنٹس میں اگنی ویروں کو دیا جائے گا۔
آج ٹویٹوں کی ایک سیریز میں وزیر دفاع کے دفتر نے کہا’’وزیر دفاع راج ناتھ سنگھ نے ضروری اہلیت کے معیار کو پورا کرنے والے اگنی ویروں کو وزارت دفاع کے عہدوں میں۱۰فیصد ریزرویشن سے متعلق تجویز کو منظوری دے دی گئی ہے ‘‘۔
ٹویٹ میں کہا گیا ہے کہ یہ۱۰فیصد ریزرویشن کوسٹ گارڈ، ڈیفنس سول پوسٹس اور ڈیفنس سیکٹر کے تمام ۱۶پی ایس یو میں دیا جائے گا۔ یہ سابق فوجیوں کو دیے گئے ریزرویشن کے علاوہ ہوگا۔ اس فیصلے کو نافذ کرنے کیلئے متعلقہ ریکروٹمنٹ رولز میں ضروری ترامیم کی جائیں گی۔
وزیر دفاع کے دفتر نے کہا ہے کہ ڈیفنس پبلک سیکٹر انڈرٹیکنگس کو بھی بھرتی کے قوانین میں ترمیم کرنے کا مشورہ دیا جائے گا۔ ضرورت پڑنے پر عمر کی بالائی حد میں رعایت کا بھی انتظام کیا جائے گا۔
واضح رہے کہ مرکزی وزارت داخلہ نے بھی آج صبح اعلان کیا تھا کہ سنٹرل پولیس فورس اور آسام رائفلز میں اگنی ویروں کو۱۰فیصد ریزرویشن دیا جائے گا۔
واضح رہے کہ حکومت نے تینوں سروسز میں فوجیوں کی بھرتی کے لیے اگنی پتھ اسکیم شروع کی ہے جس میں اگنی پتھ کی مدت صرف چار سال رکھی گئی ہے ۔ اس کے خلاف ملک کے نوجوان جگہ جگہ مظاہرے کر رہے ہیں اور آگ لگا رہے ہیں۔ حکومت نوجوانوں کو اعتماد میں لینے اور انہیں اگنی پتھ اسکیم میں شامل ہونے کے لیے تیار کرنے کے مقصد سے مختلف رعایتوں کا اعلان کر رہی ہے ۔