پی ایچ ای ڈیلی ویجروں نے۱۰دنوں کیلئے ہڑتال ختم کر دی

جموں//
جل شکتی کے وزیر جاوید احمد رانا کے ساتھ جمعرات کو میٹنگ کے بعد پی ایچ ای ڈیلی ویجروں نے کام چھوڑ ہڑتال۱۰دنوں کے کے لئے ختم کر دی۔
واضح رہے کہ محکمہ جل شکتی میں کام کرنے والے ڈیلی ویجر گذشتہ کچھ روز سے کام چھوڑ ہڑتال پر تھے ۔
جموں کشمیر اسمبلی میں لیڈر آف اپوزیشن سنیل شرما نے حکومت سے اپیل کی تھی کہ وہ ہڑتال پر بیٹھے ان ڈیلی ویجروں کے ساتھ بات کرے ۔ان کا کہنا تھا کہ ان کی کام چھوڑ ہڑتال سے جموں وکشمیر میں پانی کی شدید قلت پیدا ہوئی ہے ۔
وزیر اعلیٰ عمر عبداللہ نے ان ڈیلی ویجروں سے ہڑتال ختم کرنے کی اپیل کی تھی اور انہیں سرکار کی طرف سے عارضی ملازموں کیلئے بنائی گئی کمیٹی کے ساتھ بات کرنے کو کہا تھا۔
یہ ڈیلی ویجر کم ازکم ویجز ایکٹ لاگو کرنے‘ ۴سو کروڑ رویے پنڈنگ رقم واگذار کرنے اور ریٹائر منٹ کے معاملے کے مطالبوں کو لے کر کام چھوڑ ہڑتال پر تھے ۔
وزیر کے ساتھ جمعرات کو میٹنگ کے بعد ڈیلی ویجروں کے ایک عہدیدار نے میڈیا کو بتایا’’آج صبح ہماری جل شکتی کے وزیر جاوید احمد صاحب کے ساتھ ان کی رہائش گاہ پر میٹنگ ہوئی، جنہوں نے ہمیں عید، نوراتری کے تہواروں کے پیش نظر ہڑتال ختم کرنے کو کہا‘‘۔
انہوں نے کہا’’وزیر نے ہماری دو مانگوں۴سو کروڑ روپے واگذار کرنے اور لداخ یونین ٹریٹری کی طرح منیمم ویجز دینے کا وعدہ کیا جبکہ ریٹائرمنٹ کے معاملے کے بارے میں بھی وہ متعلقہ افسروں کے ساتھ بات کریں گے ‘‘۔
ان کا کہنا تھا’’ہم نے کام چھوڑ ہڑتال۱۰دنوں کے لئے ختم کر دی ہے تاہم ہم احتجاج جاری رکھیں گے کیونکہ ہمارے ساتھ پہلے بھی دھوکہ ہوا ہے‘‘۔
دریں اثنا وزیر جل شکتی نے’ایکس‘پر اپنے ایک پوسٹ میں کہا’’پی ایچ ای کے ڈیلی ویجروں کے ساتھ ثمر آور بات ہوئی جنہوں نے ہڑتال ختم کرنے کا فیصلہ لیا‘‘۔
رانا نے کہا’’میں نے انہیں یقین دلایا کہ عمر عبداللہ کی قیادت والی حکومت مرحلہ وار طریقے سے ان کے حقیقی مسائل کو حل کرنے کیلئے پرعزم ہے اور ان کی گراں قدر خدمات کو تسلیم کیا جاتا ہے ‘‘۔
ان کا پوسٹ میں مزید کہنا تھا’’ہم ڈیلی ویجروں کے مسائل کو حل کرنے کیلئے ایک منصفانہ طریقے سے کام کر رہے ہیں۔‘‘