کشمیر میں ۹مارچ کی شام تک موسم خشک رہنے کا امکان

سرینگر//
محکمہ موسمیات کی پیش گوئی کے مطابق وادی کشمیر میں اگلے۴دنوں کے دوران موسم خشک رہنے کا امکان ہے ۔
متعلقہ محکمے کے ایک ترجمان نے بتایا کہ وادی میں ۹مارچ کی شام تک موسم خشک رہنے کا امکان ہے ۔
ترجمان نے کہا کہ وادی میں۱۰اور۱۱مارچ کو موسم ایک بار پھر خراب ہوسکتا ہے جس کے نتیجے میں پہاڑی علاقوں میں ہلکی سے درمیانہ درجے کی برف باری یا بارشیں متوقع ہیں۔ان کا کہنا ہے کہ ۱۲مارچ کو موسم عام طور پر خشک رہنے کا امکان ہے ۔
ترجمان نے کہا کہ وادی میں۱۳؍اور۱۴مارچ کو برف و باراں کا ایک اور مرحلہ متوقع ہے ۔
محکمے نے اپنی ایڈوائزری میں سیاحوں، مسافروں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں جبکہ کسانوں سے کہا گیا ہے کہ وہ ۹مارچ تک اپنے کھیت کھلیانوں اور باغوں میں کام جاری رکھ سکتے ہیں۔
محکمے نے لوگوں سے کہا ہے کہ وہ ان علاقوں میں جانے سے پرہیز کریں جہاں برفانی تودے گر آنے کے خطرات رہتے ہیں۔
ادھر وادی کے شبانہ درجہ حرارت میں مزید گراوٹ ریکارڈ ہوئی ہے ۔
گرمائی دارلحکومت سری نگر میں کم سے کم درجہ حرارت منفی۵ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۵ء۲ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۵ء۶ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۵ء۵ڈگری سینٹی گریڈ ریکارڈ ہوا تھا۔
ایک اورسیاحتی مقام پہلگام میں کم سے کم درجہ حرارت منفی۶ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۶ء۰ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت منفی۶ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۴ء۰ڈگری سینٹی گریڈ ریکارڈ ہوا تھا۔
دریں اثنا وادی میں بدھ کو صبح سے ہی دھوپ کھلی رہی جس سے لوگوں کو صحنوں، پارکوں اور دکان تھڑوں پر بیٹھے لطف اندوز ہوتے ہوئے دیکھا گیا۔
اس دوران سیاحتی مقام سونہ مرگ کے سربل علاقے میں برفانی تودا گر آیا تاہم جانی یا مالی نقصان کی کوئی اطلاع نہیں ہے ۔
اطلاعات کے مطابق بدھ کے روز سیاحتی مقام سونہ مرگ میں ایک بھاری برکم برفانی تودا گر آیا ۔
سونہ مرگ کی سیر وتفریح پر آئے کئی سیاحوں نے برفانی تودے کی ویڈیو کو سوشل میڈیا پر شیئر بھی کیا ہے ۔
بتادیں کہ بھاری برف باری کے بیچ ڈزاسٹر مینجمنٹ نے سونہ مرگ اور گلمرگ میں برفانی تودے گر آنے کی وارننگ جاری کی ہے ۔