اسٹیو اسمتھ بولڈ ہونے کے باوجود آؤٹ نہ ہوئے، ویڈیو وائرل

کراچی:
چیمپیئنز ٹرافی کے پہلے سیمی فائنل میں آسٹریلوی کپتان اسٹیو اسمتھ بولڈ ہونے کے باوجود بال بال بچ گئے۔
آئی سی سی نے اپنے انسٹاگرام اکاؤنٹ پر اس کی ویڈیو بھی جاری کی ہے جس میں اسمتھ واضح طور پر آؤٹ ہونے سے بال بال بچ گئے تھے۔
آسٹریلوی کپتان اس وقت 23 رنز بنا کر وکٹ پر موجود تھے جبکہ ٹیم کے دونوں اوپنرز پویلین لوٹ چکے تھے۔ اسٹیو اسمتھ نے بھارتی اسپنر اکشر پٹیل کے پورے اوور میں کوئی رن نہیں بنایا جبکہ ان کی آخری گیند پر آؤٹ ہوتے ہوتے بچ گئے۔
اکثر پٹیل کی گیند پر اسمتھ نے دفاعی انداز اپنایا تاہم گیند بلے اور پیڈز سے لگ کر وکٹوں پر جا ٹکرائی تاہم خوش قسمتی سے بیلز نہیں گریں جس پر اسمتھ آؤٹ نہیں ہوئے۔
سیمی فائنل میں پہلے بیٹنگ کرتے ہوئے اسمتھ نے 96 گیندوں کے عوض 73 رنز کی اننگز کھیلی جس میں 4 چوکے اور چھکا شامل تھا۔
۳بھارت کے خلاف سیمی فائنل میں کینگروز کئی مواقعوں سے فائدہ نہ اٹھا سکے تھے جبکہ کلدیپ یادیو کو رن آؤٹ کا موقع گنوانے پر ویرات کوہلی اور روہت شرما کی ڈانٹ ڈپٹ کا سامنا بھی کرنا پڑا تھا۔