آئی جی پی کا دورہ بارہمولہ مشترکہ سیکورٹی تیاریوں کا لیا جائزہ

سرینگر//
انسپکٹر جنرل آف پولیس (آئی جی پی) کشمیر زون وی کے بردی نے جموں و کشمیر پولیس اور سنٹرل ریزرو پولیس فورس (سی آر پی ایف) کی مشترکہ سیکورٹی تیاریوں اور آپریشنل صلاحیتوں کا جائزہ لینے کے لیے شمالی کشمیر کے ضلع بارہمولہ کا دورہ کیا۔
بردی نے اپنے دورے کے دوران نے ضلع پولیس لائنز بارہمولہ میں ایک اعلیٰ سطحی مشترکہ سیکورٹی جائزہ اجلاس کی صدارت کی جس میں بہتر کوآرڈینیشن، وسائل کے مشترکہ استعمال اور آپریشنل کارکردگی پر توجہ مرکوز کی گئی۔
میٹنگ میں پولیس اور سی آر پی ایف کے سینئر افسران نے شرکت کی جنہوں نے مشترکہ تعیناتی کی حکمت عملیوں، آپریشنل تیاریوں اور ابھرتے ہوئے سیکورٹی چیلنجوں پر غور کیا۔
آئی جی پی نے امن و امان کو برقرار رکھنے میں دونوں افواج کی کوششوں کو سراہتے ہوئے خطے کے سیکورٹی فریم ورک کو مضبوط بنانے کیلئے مسلسل تعاون کی ضرورت پر زور دیا۔
اس دوران انہوں نے اسپیشل آپریشنز گروپ (ایس او جی) کی آپریشنل تیاریوں اور صلاحیتوں کا بھی جائزہ لیا۔ انہوں نے انسداد دہشت گردی کی کارروائیوں میں ان کے اہم کردار کو تسلیم کرتے ہوئے ان کی اعلیٰ سطح کی تربیت اور پیشہ ورانہ مہارت پر اطمینان کا اظہار کیا۔ اور اس بات چیت میں موسم گرما کے آپریشن کی حکمت عملی، اہم حفاظتی حکمت عملیوں اور آئندہ سیزن کیلئے ہنگامی منصوبوں کا خاکہ بھی شامل تھا۔
اس موقع پر بردی نے اپنے خطاب میں اہلکاروں کی لگن اور پیشہ ورانہ مہارت کی تعریف کی اور ان کے درمیان مسلسل تعاون کی اہمیت اور ابھرتے ہوئے سیکیورٹی چیلنجوں کا مقابلہ کرنے کیلئے فعال اقدامات پر زور دیا۔