وادی میںبرفباری اور بارشوں کے بعد موسم میں بہتری

سرینگر//
وادی کشمیر کے پہاڑی علاقوں میں برف باری اور میدانی علاقوں میں بارشوں کے بعد موسم میں بتدریج بہتری واقع ہو رہی ہے ۔
محکمہ موسمیات کے ایک ترجمان کے مطابق وادی میں اب۲۴فروری تک موسم میں کسی خاص تبدیلی کا کوئی امکان نہیں ہے ۔
ترجمان نے کہا کہ تاہم بعد ازاں۲۶سے۲۸ فروری تک وادی میں برف و باراں کا ایک اور مرحلہ متوقع ہے ۔ان کا کہنا تھا کہ وادی میں۲۶سے۲۸فروری تک وادی میں کئی مقامات پر برف باری یا بارشوں کا امکان ہے ۔
دریں اثنا سری نگر میں گذشتہ چوبیس گھنٹوں کے دوران۴ء۱۱ملی میٹر بارش ریکارڈ ہوئی ہے ۔
سیاحتی مقام گلمرگ میں گذشتہ چوبیس گھنٹوں کے دوران۸ء۷ملی میٹر بارش اور۷سینٹی میٹر برف ریکارڈ ہوئی ہے جبکہ اس دوران وادی کے دوسرے مشہور سیاحتی مقام پہلگام میں۶ء۱۴ملی میٹر بارش اور۱۳سینٹی میٹر برف ریکارڈ ہوئی ہے ۔
سری نگر ہوائی اڈے پر۰ء۱۱ملی میٹر بارش ریکارڈ ہوئی ہے ۔
شمالی ضلع کپوارہ میں گذشتہ چوبیس گھنٹوں کے دوران۶ء۹ملی میٹر بارش ریکارڈ ہوئی ہے جبکہ گیٹ وے آف کشمیر کے نام سے مشہور قصبہ قاضی گنڈ میں۲ء۱۴ملی میٹر بارش ریکارڈ ہوئی ہے ۔
چرار شریف، سوپور، اور ٹنگہ مرگ میں بالترتیب۶ء۳ملی میٹر‘۰ء۸ملی میٹر اور۲ء۱۴ملی میٹر بارش ریکارڈ ہوئی ہے ۔
شمالی کشمیر کے ضلع بارہمولہ اور بانڈی پورہ میں بالترتیب۰ء۱۲ملی میٹر اور۰ء۶ملی میٹر بارش ریکارڈ ہوئی ہے جبکہ وسطی کشمیر کے ضلع بڈگام اور گاندربل میں بالترتیب۰ء۷ملی میٹر اور۰ء۹ملی میٹر بارش ریکارڈ ہوئی ہے ۔
جنوبی کشمیر کے اننت ناگ، پلوامہ، شوپیاں اور کولگام میں گذشتہ چوبیس گھنٹوں کے دوران بالترتیب ۰ء۱۲ملی میٹر‘۰ء۵ملی میٹر‘۵ء۱۰ملی میٹر اور۵ء۵ملی میٹر بارش ریکارڈ ہوئی ہے ۔
جموں میں گذشتہ چوبیس گھنٹوں کے دوران۴ء۲۷ملی میٹر بارش ریکارڈ ہوئی ہے جبکہ کٹھوعہ، اودھم پور، رام بن، پونچھ، راجوری، کشتواڑ، ریاسی اور سانبہ میں بالترتیب۲ء۳۴ملی میٹر‘۶ء۳۴ملی میٹر‘۵ء۳۵ملی میٹر‘۰ء۲۳ملی میٹر‘۰ء۲۰ملی میٹر‘۰ء۱۶ملی میٹر۰ء۲۱ملی میٹر اور۵ء۲۰ملی میٹر بارش ریکارڈ ہوئی ہے ۔
وادی میں خراب موسمی صورتحال سے شبانہ درجہ حرارت میں گراوٹ درج ہوئی ہے ۔
گرمائی دارلحکومت سری نگر میں کم سے کم درجہ حرارت۶ء۱ڈگری سینٹی گریڈ ریکارڈ کیا گیا جو معمول سے۱ء۰ڈگری سینٹی گریڈ کم ریکارڈ ہوا تھا۔
سیاحتی مقامات گلمرگ اور پہلگام میں شبانہ درجہ حرارت ایک بار پھر نقطہ انجماد سے نیچے ریکارڈ ہوا ہے ۔
گلمرگ میں کم سے کم درجہ حرارت منفی۶ء۵ڈگری سینٹی گریڈ ریکارڈ کیا گیا جبکہ پہلگام میں شبانہ درجہ حرارت منفی۴ء۲ڈگری سینٹی گریڈ ریکارڈ ہوا ہے ۔
شمالی ضلع کپوارہ میں کم سے کم درجہ حرارت۹ء۰ڈگری سینٹی گریڈ جبکہ قاضی گنڈ میں شبانہ درجہ حرارت۳ء۰ڈگری سینٹی گریڈ ریکارڈ ہوا ہے ۔
ادھر تازہ برف و باراں سے وادی میں لوگوں بالخصوص کسانوں میں خوشی کی لہر دوڑ گئی ہے ۔
وادی میں خشک موسم صورتحال سے جہاں وادی کئی چشمے سوکھ گئے ہیں، وہیں اس دوران کئی علاقوں کے جنگلوں میں آتشزدگی کے واقعات رونما ہو رہے ہیں۔
محکمہ موسمیات کے مطابق وادی میں سال رواں کے پہلے ڈیڑھ ماہ کے دوران بارش کی۷۹فیصد کمی ریکارڈ ہوئی ہے جبکہ اس دوران جموں میں بارش کی۸۴فیصد کمی درج ہوئی ہے ۔
اس دوران وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر ٹریفک کی نقل و حمل بحال کر دی گئی ہے ۔
بتادیں کہ بھاری برف باری کی وجہ سے بانہال اور رامسو کے درمیان پھسلن پیدا ہونے کی وجہ سے گذشتہ شام قومی شاہراہ پر ٹریفک کی نقل و حمل کو بند کر دیا گیا تھا۔
ٹریفک حکام نے جمعہ کی صبح کہا کہ قومی شاہراہ پر ٹریفک کی دو طرفہ نقل و حمل بحال کر دی گئی ہے ۔انہوں نے کہا کہ فی الوقت مسافر بردار گاڑیاں دونوں طرف چل رہی ہیں جبکہ بڑی گاڑیوں کو بھی جلد ہی چلنے کی اجازت دی جائے گی۔
حکام نے مسافروں سے لین ڈسپلن پر عمل کرنے اور اوور ٹیکنگ کرنے سے احتراز کرنے کی اپیل کی ہے ۔
ادھر وادی کو لداخ یونین ٹریٹری کے ساتھ جوڑنے والی سرینگر، لیہہ شاہراہ پر ٹریفک کی نقل و حمل ہنوز بند ہے ۔
اس شاہراہ کو گذشتہ روز زوجیلا پر بھاری برف باری ہونے کے بعد بند کر دیا گیا تھا۔جنوبی کشمیر کے ضلع شوپیاں کو جموں صوبے کے راجوری اور پونچھ اضلاع کے ساتھ جوڑنے والا تاریخی مغل، سنتھن روڈ اور بھدرواہ، چمبا روڈ گذشتہ کم و بیش دو ماہ س مسلسل بند ہیں۔
قابل ذکر ہے کہ محکمہ موسمیات کی پیش گوئی کے عین مطابق وادی کشمیر میں جمعرات کو وسیع پیمانے پر برف باری اور بارشیں ہوئیں۔