شوپیاں اور اننت ناگ میں منشیات فروشوں کی جائیدادیں قرق:پولیس

سرینگر//
منشیات کا کاروبار کرنے والوں کے خلاف اپنی جنگ جاری رکھتے ہوئے پولیس نے شوپیاں اور اننت ناگ میں ایک کروڑ ۲۲لاکھ رروپیہ مالیت کی جائیداد کو قرق کیا ہے ۔
پولیس کے ایک ترجمان نے بتایا کہ شوپیاں پولیس نے منشیات فروش مدثر احمد ملک، یاور احمد ملک اور شاہد السلام ملک پسران غلام محمد ملک ساکن ملہورہ زینہ پورہ کی جائیداد کو این ڈی پی ایس ایکٹ کے تحت منسلک کیا ہے ۔
ترجمان نے کہاکہ زینہ پورہ پولیس تھانے میں درج ایف آئی آر زیر نمبر۲۰۲۱/۵۴کے تحت کارروائی عمل میں لائی گئی۔
ان کے مطابق قانونی قواعد و ضوابط مکمل کرنے کے بعد ایگزیکٹیو مجسٹریٹ کی موجودگی میں جائیداد کو اٹیچ کیا گیا۔
بیان میں کہا گیا کہ شوپیاں پولیس کی طرف سے تحقیقات کے دوران جائیداد کی شناخت غیر قانونی طور حاصل شدہ جائیداد کے طور پر ہوئی ہے ۔
دریں اثنا جنوبی ضلع اننت ناگ میں بھی پولیس نے منشیات فروش کی ایک کروڑ روپیہ مالیت کی جائیداد کو قرق کیا۔
پولیس بیان کے مطابق عبدالمجید بٹ داماد محمد احسن گنائی ساکن چی گنڈ سری گفوارہ کی جائیداد جس میں ایک کنال اراضی اور دو منزلہ رہائشی مکان شامل ہیں کو ضبط کیا گیا ہے ۔
پولیس کے مطابق اس طرح کی کارروائی سے منشیات فروشوں کے حوصلے پست ہوجائیں گے اور منشیات کے کاربار میں کمی آسکتی ہے ۔
پولیس ترجمان نے بتایا کہ جائیداد کی ضبطی سے منشیات کے غیر قانونی کاروبار میں ملوث افراد کو ایک مضبوط پیغام جاتا ہے کہ ایسی سرگرمیوں کو برداشت نہیں کیا جائے گا۔
قابل ذکر ہے کہ پولیس نے سال رواں میں وادی کشمیر کے مختلف اضلاع میں این ڈی پی ایس ایکٹ کے تحت کئی منشیات فروشوں کی پراپرٹی کو اٹیچ کیا ہے ۔