سرینگر//
وادی کشمیر میں پیر کے روز تمام تر تیاریوں کے بیچ دسویں جماعت کے بورڈ امتحانات شروع ہوئے ۔
دسویں جماعت کے یہ امتحانات آج سے شرع ہو کر۱۹مارچ کو اختتام پذیر ہوں گے ۔
جموں وکشمیر بورڈ آف سکول ایجوکیشن کے مطابق سافٹ زون میں شروع ہونے والے دسویں جماعت کے امتحانات میں کل ایک لاکھ ۲۶ہزار۷سو۱۱طلبا شرکت کر رہے ہیں جبکہ ان کیلئے ایک ہزار۳سو۱۶امتحانی مراکز قائم کئے گئے ہیں۔حکام نے کہا کہ دسویں جماعت کے امتحانات شام کے شفٹ میں دو پہر ایک بجکر۳۰منٹ پر شروع ہوں گے ۔
ادھر وادی میں دسویں جماعت کیلئے قائم امتحانی مراکز پر صبح سے ہی گہماگہمی دیکھی گئی اور طلبا کو وقت سے پہلے ہی اپنے اپنے امتحانی مراکز کی طرف جاتے ہوئے دیکھا گیا۔
بڈگام میں ایک امتحانی مرکز پر ساجد علی نامی طالب علم نے یو این آئی کو بتایا’’میں امتحان دینے کیلئے پوری طرح سے تیار ہوں کیونکہ ہمیں تیاری کرنے کیلئے اچھا وقت مل گیا‘‘۔انہوں نے کہا’’میں تھوڑا بہت نروس ضرور ہوں لیکن اپنی تیاری پر پورا اعتماد ہے اور مجھے یقین ہے کہ میں اچھے نمبرات کے ساتھ اس امتحان کو پاس کروں گا‘‘۔
ایک امتحانی سینٹر پر تعینات ایک استاد نے بتایا’’امتحانات کیلئے تمام تر تیاریوں کو عمل میں لایا گیا ہے اور بچوں کو اس دوران تمام تر سہولیات فراہم کی جائیں گی‘‘۔انہوں نے کہا’’امتحانی مرکز پر عملے اور دیگر ضروریات کو دستیاب رکھا گیا ہے تاکہ طلبا کو کسی پریشانی کا سامنا نہ کرنا پڑے ‘‘۔
بتادیں کہ وادی میں بارہویں جماعت کے امتحانات پہلے ہی یعنی سنیچر سے شروع ہوئے ہیں۔
جموں وکشمیر میں بارہویں جماعت کے سالانہ امتحانات میں کل۹۴ہزار ایک سو۶۸بچے شرکت کر رہے ہیں جن کیلئے کل۸سو۷۳؍امتحانی مراکز قائم کئے گئے ہیں۔
حکام کے مطابق ان میں سے کشمیر میں کل۵۰ہزار۶سو۷طلبا شرکت کر رہے ہیں جن کیلئے۴سو۷۰؍امتحانی مراکز قائم کئے گئے ہیں جبکہ صوبہ جموں میں کل۴۲ہزار۵سو۵۹بچے ان امتحانات میں شرکت کر رہے ہیں جن کیلئے۴سو۳؍امتحانی مراکز قائم کئے گئے ہیں۔
قابل ذکر ہے کہ جموںکشمیر کی تاریخ میں یہ پہلا موقع ہے کہ جب جے کے بی او ایس ای اور سی بی ایس ای کے دونوں۱۰ویں اور۱۲ویں جماعت کے امتحانات ایک ساتھ منعقد ہو رہے ہیں۔
