یوم جمہوریہ :جموں اور سرینگر سخت حفاظتی اقدامات

سرینگر کے بخشی اسٹیڈئم کے گرد و نواح میں سکیورٹی بڑھا دی گئی ‘ کئی مقامات پر خصوصی ناکے بھی قائم
جموں//
یوم جمہوریہ کی تقریبات سے پہلے جموں اور سرینگر میں سیکورٹی بڑھا دی گئی ہے ۔ پولیس نے جموں میں احتیاطی اقدام کے طور پر تقریب کے مرکزی مقام ایم اے اسٹیڈیم کو عوام کے لئے حدود سے باہر کر دیا ہے۔
جموں کشمیر پولیس کی سیکورٹی ونگ نے اسٹیڈیم کا کنٹرول سنبھال لیا ہے ، جہاں لیفٹیننٹ گورنر منوج سنہا یوم جمہوریہ کی تقریب کی صدارت کریں گے اور وزیر اعلی عمر عبداللہ مہمان خصوصی ہوں گے۔
عہدیداروں نے کہا’’یوم جمہوریہ سے پہلے سیکورٹی بڑھا دی گئی ہے‘‘۔ ایک سینئر پولیس افسر نے بتایا کہ پولیس کی سیکورٹی ونگ نے مرکزی مقام کا چارج سنبھال لیا ہے۔
عہدیداروں نے بتایا کہ حفاظتی اقدامات کے طور پر اس مقام کو عام لوگوں تک محدود کردیا گیا ہے۔ انہوں نے مزید کہا کہ مرکزی مقام اور اس کے آس پاس کے علاقوں کی صفائی کا کام مکمل کر لیا گیا ہے۔
اسٹیشن ہاؤس افسروں اور سب ڈویڑنل افسروں کو ہدایت دی گئی ہے کہ وہ اپنے متعلقہ علاقوں میں چیکنگ کریں اور یوم جمہوریہ کی تقریبات کو واقعات سے پاک بنانے کیلئے چوبیس گھنٹے نگرانی رکھیں۔
لیفٹیننٹ گورنر سنہا جموں کے ایم اے اسٹیڈیم میں مرکزی تقریب کی صدارت کریں گے اور سلامی لیں گے۔وزیر اعلیٰ‘عمرعبداللہ اس تقریب کے مہمان خصوصی ہوں گے۔
جنرل ایڈمنسٹریشن ڈپارٹمنٹ کی جانب سے جاری ایک حکم کے مطابق ڈپٹی چیف منسٹر سریندر چودھری اور کابینی وزراء جاوید احمد ڈار، سکینہ اٹو، ستیش شرما اور جاوید رانا بالترتیب سرینگر، بارہمولہ، اننت ناگ، کٹھوعہ اور ادھم پور اضلاع میں منعقدہ تقریبات میں سلامی لیں گے۔
بقیہ ۱۴؍ اضلاع میں متعلقہ ڈسٹرکٹ ڈیولپمنٹ کونسل (ڈی ڈی سی) کے چیئرپرسن ضلعی ہیڈ کوارٹرز میں منعقد ہونے والی مرکزی تقریبات میں سلامی لیں گے۔
عہدیداروں نے بتایا کہ سیکورٹی فورسز نے جموں خطے کے کئی حصوں بالخصوص سرحدی علاقوں میں گاڑیوں اور پیدل چلنے والوں کی چیکنگ تیز کردی ہے۔
عہددیداروں نے مزید کہا کہ شہر کے اندر چوراہوں اور اس کے داخلی اور خارجی راستوں پر ’ناکے‘ اور موبائل وہیکل چیک پوائنٹس (ایم وی سی پی) قائم کیے گئے ہیں۔
عہدیداروں نے بتایا کہ پولیس اور سی آر پی ایف کے جوانوں کو اہم علاقوں میں تعینات کیا گیا ہے۔
فوج، بی ایس ایف، سی آر پی ایف، پولیس اور ولیج ڈیفنس گارڈ (وی ڈی جی) کے جوانوں نے بین الاقوامی سرحد (آئی بی)، لائن آف کنٹرول (ایل او سی) اور مختلف پہاڑی اور سرحدی اضلاع کے حساس اندرونی علاقوں میں سخت نگرانی برقرار رکھی ہے۔
بین الاقوامی سرحد اور ایل او سی پر بی ایس ایف اور فوج کی جانب سے گشت تیز کردیا گیا ہے جبکہ سرحدی پولیس یونٹس اور وی ڈی جی کے ارکان کو دراندازی کی کسی بھی کوشش کو روکنے کیلئے متحرک کردیا گیا ہے۔
کشمیر ‘جہاں مرکزی تقریب سرینگر کے بخشی اسٹیڈئم میں ہو گی‘ میں سکیورٹی کے انتظام مزید سخت کر دئے گئے ہیں ۔بخشی اسٹیڈئم میں نائب وزیر اعلیٰ‘ سریندر چوھردی مارچ پاس کی سلامی لیں گے ۔