ملازمین سے یوم جمہوریہ اور بیٹنگ ریٹریٹ تقریبات میں شرکت کی ہدایت

جموں//
جموں کشمیر حکومت نے تمام سرکاری ملازموں کو یوم جمہوریہ اور ’بیٹنگ ریٹریٹ‘تقریبات میں اپنی ڈیوٹی کے ایک حصہ کے طور شرکت کرنے کی ہدایت دی ہے ۔
بتادیں کہ جموں وکشمیر میں یوم جمہوریہ سال۲۰۲۵کی سب سے بڑی تقریب لیفٹیننٹ گورنر منوج سنہا کی قیادت میں جموں کے مولانا آزاد اسٹیڈیم میں منعقد ہوگی۔
حکومت کی طرف سے جاری ایک حکمنامے میں کہا گیا کہ سال۲۰۲۵کی یوم جمہوریہ کی سب سے بڑی تقریب مولانا آزاد اسٹیدیم جموں میں منعقد ہو رہی ہے جس کی صدارت لیفٹیننٹ گورنر منوج سنہا کریں گے اور پریڈ کی سلامی لیں گے ۔
حکمنامے میں کہا گیا’’جموں میں تعینات حکومت اور پبلک سیکٹر انڈر ٹیکنگز کے تمام افسران/ اہلکاروں سے کہا جاتا ہے کہ وہ اپنی سرکاری ڈیوٹی کے حصہ کے طور پر تقریب میں شرکت کریں‘‘۔
حکمنامے میں تمام محکموں کے سربراہان اور پبلک سیکٹر انڈرٹیکنگز کے چیف ایگزیکٹوز سے تاکید کی گئی ہے کہ وہ اس تقریب میں اپنی اور اپنے ماتحت ملازمین کی شرکت کو یقینی بنائیں۔
دریں اثنا حکومت کی طرف سے جاری دوسرے سرکیوکر میں کہا گیا کہ یوم جمہوریہ کی تقریبات کی’بیٹنگ ریٹریٹ‘تقریب۲۹جنوری کو شام ساڑھے چار بجے مولانا آزاد اسٹیڈیم جموں میں منعقد ہوگی۔