ریزرویشن تنازعہ:طلباء کے وفد کویقین دہانیاں دیں:وزیر اعلیٰ

سرینگر//
جموںکشمیر کے وزیر اعلیٰ عمر عبداللہ کا کہنا ہے کہ انہوں نے اوپن میرٹ سٹوڈنٹس ایسو سی ایشن کے ساتھ بات کرکے انہیں متعدد یقین دہانیاں دیں۔
عمر نے کہاکہ رابطے کا یہ سلسلہ بغیر کسی رکاوٹ کے کھلا رہے گا۔
وزیر اعلیٰ عمر عبداللہ ’ایکس ‘پر جانکاری فراہم کرتے ہوئے بتایا کہ اوپن میرٹ سٹوڈنٹس ایسو سی ایشن کے وفد کے ساتھ ملاقات کے دوران انہیں جائز مطالبات کو حل کرنے کا یقین دلایا۔
عمر نے کہاکہ جمہوریت کا حسن یہ ہے کہ آپسی گفت وشنید اور بات چیت کے ذریعے مسائل کا حل نکالا جائے ۔ان کا مزید کہنا تھا کہ سٹوڈنٹس ایسو سی ایشن کے وفد سے کچھ گزارشات کیں ۔وزیر اعلیٰ نے کہا’’رابطے کا یہ سلسلہ بغیر کسی ثالث کے کھلا رہے گا‘‘۔
اس سے پہلے ریزرویشن معاملے پر آغا روح اللہ مہدی کی جانب سے تشکیل دی گئی دس نفری طلبا کمیٹی نے وزیر اعلیٰ کے ساتھ ملاقات کی جس دوران کئی اہم مسائل پر کھل کر گفت وشنید ہوئی۔
وزیر اعلیٰ نے وفد کو یقین دلایا کہ ریزرویشن معاملے کو چھ ماہ کے اندر اندر حل کیا جائے گا اور حکومت کے دائرہ اختیار میں جو کچھ بھی ہے اس پر جلد از جلد آرڈر نکالا جائے گا۔
اطلاعات کے مطابق ریزرویشن کو کالعدم قرار دینے کے معاملے پر ممبر پارلیمنٹ آغا روح اللہ مہدی کی سربراہی میں آج سرینگر میں وزیر اعلیٰ کی رہائش گاہ کے باہر دھرنا دیا گیا۔
آغا روح اللہ نے طلبا کی دس نفری کمیٹی تشکیل دے کر انہیں وزیر اعلیٰ کے ساتھ ملاقی ہونے کے لئے بھیجا ۔
میٹنگ کے بعد نامہ نگاروں سے بات چیت کے دوران طلبا کمیٹی کے ممبران نے کہاکہ وزیر اعلیٰ کے ساتھ خوشگوار ماحول میں بات چیت ہوئی۔
طلباء نے مزید بتایا کہ آدھے گھنٹے تک عمر عبداللہ نے ہماری بات غور سے سنی اور سبھی مسائل کو وقت مقررہ کے اندر اندر حل کرنے کا یقین دلایا۔
کمیٹی کے ممبران کا مزید کہنا تھا کہ وزیر اعلیٰ عمر عبداللہ نے ریزرویشن مسئلے کو چھ ماہ کے اندر اندر حل کرنے کا وعدہ کیا ہے ۔
ان کے مطابق وزیر اعلیٰ نے ملاقات کے دوران بتایا کہ ای ڈبیلو ایس دس فیصدی ریزرویشن اور دوسرے معاملات جو کہ حکومت کے زیر کنٹرول ہے پر بہت جلد آرڈر نکالا جائے گا۔
طلبا نے کہاکہ ہم نے وزیراعلیٰ عمر عبداللہ کو بتایاکہ اوپن میرٹ کیلئے۷۶فیصد کوٹا رکھا جائے جس پر وزیر اعلیٰ نے کہاکہ معاملہ کورٹ میں بھی چل رہا ہے تاہم سب کمیٹی سبھی سے بات چیت کے بعد جو رپورٹ پشی کرئے گی اس پر منصفانہ فیصلہ سامنے آئے گا۔
ان کے مطابق وزیر اعلیٰ سے بات چیت کے دوران طلبا ممبران نے کہاکہ اس معاملے کو جلدازجلد حل کیا جانا چاہئے جس پر عمر عبداللہ نے کہاکہ ریزرویشن معاملے پر سبھی طبقوں کے ساتھ انصاف کیا جائے گا ۔
بتادیں کہ آغا روح اللہ مہدی کی سربراہی میں پیر کے روز طلبا کی ایک بڑی تعداد نے ریزرویشن پالیسی کو منسوخ کرنے کے مطالبے کو لے کر دھرنا دیابعد ازاں ایک اعلیٰ سطحی وفد نے وزیرا علیٰ کے ساتھ ملاقات کی جس دوران وقت مقررہ کے اندر اندر سبھی مسائل کو حل کرنے کی یقین دہانی کرائی گئی۔