جوروٹ نے سچن ٹنڈولکر کا طویل ریکارڈ بالآخر توڑ ہی دیا

کرائسٹ چرچ//برطانوی بیٹر جو روٹ نے سچن ٹنڈولکر کا طویل ٹیسٹ ریکارڈ توڑ دیا۔
انگلینڈ کے تجربہ کار بلے باز جو روٹ نے ٹیسٹ کرکٹ میں دھوم مچا دی اور وہ سچن ٹنڈولکر کو پیچھے چھوڑ کر فارمیٹ کی چوتھی اننگز میں سب سے زیادہ رنز بنانے والے کھلاڑی بن گئے۔
جو روٹ نے یہ سنگ میل ہیگلے اوول میں تین میچوں کی سیریز کے پہلے ٹیسٹ میں نیوزی لینڈ کے خلاف انگلینڈ کی آٹھ وکٹوں سے فتح کے دوران حاصل کیا۔
دائیں ہاتھ کے بلے باز نے ناٹ آؤٹ 22 رنز بنائے جو انہیں ہم وطن ایلسٹر کک اور ہندوستان کے عظیم بلے باز ٹنڈولکر کو پیچھے چھوڑنے کے لیے کافی تھے۔ روٹ کے اب چوتھی اننگز میں 1630 رنز ہیں جو ٹنڈولکر کے 1625 رنز سے پانچ زیادہ ہیں۔
ٹیسٹ میں چوتھی اننگز میں سب سے زیادہ رنزجو روٹ کے ہیں جنہوں نے 49 اننگز میں 1630 رنز سکور کیے، سچن ٹنڈولکر 60 اننگز میں 1625 رنز بنا کر دوسرے ، گریم سمتھ 41 اننگز میں 1611 رنز سکور کرکے تیسرے، ایلسٹر کک 53 اننگز میں 1611 رنز بناکر چوتھے جب کہ شیو نارائن چندر پال 49 اننگز میں 1580 رنزبناکر اس فہرست میں پانچوی نمبر پر ہیں ۔
جو روٹ کی چوتھی اننگز میں 2 سنچریاں اور 8 نصف سنچریاں شامل ہیں، فتوحات میں 620 رنز بنا کر وہ بلے بازوں کی مذکورہ فہرست میں دوسرے نمبر پر ہیں ، صرف گریم سمتھ کے پاس چوتھی اننگز میں ہزار سے زیادہ رنز جیت میں بنانے کا اعزاز ہے۔
جو روٹ ، ٹنڈولکر کے ٹیسٹ میں سب سے زیادہ رنز بنانے والے ریکارڈ کا تعاقب کر رہے ہیں اور وہ صرف 3144 رنز پیچھے ہیں۔ وہ سب سے زیادہ ٹیسٹ رنز کے ساتھ بلے بازوں کی فہرست میں 5ویں نمبر پر ہیں۔ ٹیسٹ کرکٹ میں سب سے زیادہ رنز بنانے والے بیٹرز میں سچن ٹنڈولکر (بھارت) 15921، رکی پونٹنگ (آسٹریلیا) 13378، جیک کیلس (جنوبی افریقہ) 13289، راہول ڈریوڈ 13288 اور جو روٹ (انگلینڈ) 12777 شامل ہیں۔