پریشان نہ ہوں‘اب کی بار امتحان طلبا دوست ہو گا :ناظم تعلیم

سرینگر//
ڈائریکٹر سکول ایجوکیشن کشمیر‘ تصدق حسین کا کہنا ہے محکمہ سکول ایجوکیشن نے یکساں امتحانات کے شیڈول کی تجویز پیش کی ہے جس کے تحت پہلی سے۹ویں جماعت کے امتحانات۱۵نومبر سے منعقد کیے جائیں گے ۔
حسین نے کہا کہ امتحانات کے متعلق بچوں اور والدین کو پریشان ہونے کی کوئی ضرورت نہیں ہے کیونکہ جتنا سلیبس مکمل ہوگا اسی کا امتحان لیا جائے گا۔
ناظم تعلیم نے ان باتوں کا اظہار ہفتے کو یہاں نامہ نگاروں کے ساتھ بات کرنے کے دوران کیا۔
حسین نے کہا’’یکساں ڈیٹ شیٹ نکالے جارے ہیں ہم نے ایک تجویز پیش کی ہے جس کے تحت ۱۵ نومبر سے پہلی سے۹ویں جماعت کے امتحانات منعقد کیے جائیں گے‘‘’۔ان کا کہنا تھا کہ۲۰دسمبر سے بچے نئی جماعتوں میں داخل ہوکر کلاس لیں گے ۔
ناظم تعلیم نے کہا کہ بچوں اور والدین کو فکر کرنے کی کوئی ضرورت نہیں ہے کیونکہ جتنا نصاب مکمل ہوگا اتنے کا ہی امتحان لیا جائے گا۔انہوں نے کہا’’بچوں کو پریشان ہونے کی کوئی ضرورت نہیں ہے یہ طلبا دوستانہ امتحانات ہوں گے ‘‘۔
حسین کا کہنا تھا’’جہاں تک میری معلومات ہیں تو اساتذہ نے نوے فیصد نصاب کو مکمل کیا ہے ‘‘۔دسویں اور بارہویں جماعتوں کے امتحانات کے بارے میں انہوں نے کہا کہ ان جماعتوں کے امتحانات اگلے سال فروری کے بعد منعقد ہوں گے ۔
واضح رہے کہ عوامی حکومت نے گزشتہ ہفتے کشمیر اور جموں صوبے کے سرمائی علاقوں میں نومبر دسمبر سیشن بحال کرنے کا اعلان کیا ۔ امسال ۹ویں جماعت تک کے امتحان نومبر دسمبر میں لئے جائیں گے جبکہ اگلے سال سے ۱۰ ویں سے ۱۲ویں جماعت کے امتحان بھی حسب سابقہ نومبر دسمبرمیں منعقد ہوں گے ۔