مودی کی گلوبل ساؤتھ کے لیے ‘گلوبل ڈویلپمنٹ کمپیکٹ’ کی تجویز

نئی دہلی// ہندوستان نے گلوبل ساؤتھ کے ممالک کو ان کی ترجیحات کی بنیاد پر متوازن اور پائیدار ترقی میں مدد دینے کے لیے ایک جامع ‘گلوبل ڈیولپمنٹ کمپیکٹ’ کی تجویز پیش کی ہے اور تجارت کے فروغ اور صلاحیت کی تعمیر کے لیے دو فنڈز قائم کرکے 35 لاکھ ڈالر کی تعاون کے عزم کا اظہار کیا ہے ۔
وزیر اعظم نریندر مودی نے ہفتہ کو تیسری وائس آف گلوبل ساؤتھ سمٹ کے افتتاحی اجلاس میں اپنے اختتامی بیان میں یہ تجویز پیش کی۔
مسٹر مودی نے ورچوئل طور پر منعقدہ چوٹی کانفرنس کے افتتاحی اجلاس میں شرکت کرنے والے قائدین کے خیالات اور مشوروں کے لیے اظہار تشکر کیا اور کہا کہ آپ سب نے ہمارے مشترکہ خدشات اور خواہشات کو سامنے رکھا ہے ۔ آپ کے خیالات سے واضح ہے کہ گلوبل ساؤتھ متحد ہے ۔ آپ کی تجاویز ہماری وسیع شرکت کی عکاس ہیں۔ آج کی ہماری بحث نے باہمی ہم آہنگی کے ساتھ آگے بڑھنے کی راہ ہموار کی ہے ۔ انہیں یقین ہے کہ اس سے ہمارے مشترکہ اہداف کو حاصل کرنے میں رفتار ملے گی۔
وزیر اعظم نے کہا، "آپ سب کی بات سننے کے بعد، میں آج آپ کے سامنے ہندوستان کی طرف سے ایک جامع ‘عالمی ترقیاتی کمپیکٹ’ تجویز پیش کرنا چاہتا ہوں۔ اس کمپیکٹ کی بنیاد ہندوستان کے ترقیاتی سفر اور ترقیاتی شراکت داری کے تجربات پر مبنی ہوگی۔ یہ کمپیکٹ خود گلوبل ساؤتھ کے ممالک کی طرف سے طے شدہ ترقیاتی ترجیحات سے متاثر ہوگا۔ یہ انسانوں پر مرکوز اور ترقی کے لئے کثیر جہتی ہو گا اور کثیر شعبہ جاتی نقطہ نظر کو فروغ دے گا۔ یہ ترقی کے لیے قرضوں کے نام پر ضرورت مند ممالک پر قرضوں کا بوجھ نہیں ڈالے گا۔ "یہ شراکت دار ممالک کی متوازن اور پائیدار ترقی میں حصہ ڈالے گا۔”