ہاردک پانڈیا ٹی20 آل راؤنڈر رینکنگ میں سرفہرست

دبئی// انٹرنیشنل کرکٹ کونسل (آئی سی سی) کی ٹی -20 ورلڈ کپ 2024 کے بعد جاری ہونے والی درجہ بندی میں ہندوستانی ٹیم کے آل راؤنڈر ہاردک پانڈیا وانندو ہسرنگا کے ساتھ برابر ریٹنگ کے باوجود ٹاپ پر برقرار ہیں، اس کے علاوہ ٹاپ 10 میں بھی تبدیلی آئی ہے۔
آئی سی سی کی طرف سے جاری کردہ ٹی-20 رینکنگ میں آل راؤنڈرز کی رینکنگ میں 222 کی ریٹنگ کے ساتھ، ہاردک پانڈیا دو مقام کی چھلانگ لگا کر پہلے نمبر پر آ گئے ہیں۔ ٹی-20 ورلڈ کپ کے سیمی فائنل اور فائنل میں بھی ہاردک پانڈیا نے شاندار کارکردگی کا مظاہرہ کیا تھا۔ سری لنکا کے وانندو ہسرنگا بھی 222 کی ریٹنگ کے ساتھ ہاردک کے ساتھ پہلی پوزیشن پر ہی ہیں۔
آسٹریلیا کے مارکس اسٹائنس ایک درجے کی چھلانگ لگا کر 211 کی ریٹنگ کے ساتھ تیسرے نمبر پر آگئے ہیں۔ زمبابوے کے سکندر رضا کو بھی ایک مقام کا فائدہ ہوا ہے۔ وہ 210 ریٹنگ کے ساتھ چوتھے نمبر پر ہیں۔ بنگلہ دیش کے شکیب الحسن 206 ریٹنگ کے ساتھ پانچویں نمبر پر پہنچ گئے ہیں۔
افغانستان کے محمد نبی چار درجے نیچے کھسک کرچھٹے نمبر پر آگئے ہیں۔ نیپال کے دیپندر سنگھ 199 کی ریٹنگ کے ساتھ ساتویں نمبر پر برقرار ہیں۔ انگلینڈ کے لیام لیونگسٹن ایک درجہ ترقی کرکے 187 کی ریٹنگ کے ساتھ آٹھویں نمبر پر آگئے ہیں۔ جنوبی افریقہ کے ایڈن مارکرم ایک درجہ پھسل کر 186 کی ریٹنگ کے ساتھ نویں انگلینڈ کے معین علی ایک درجہ نیچے کھسک کر 174 ریٹنگ کے ساتھ دسویں نمبر پر آگئے ہیں۔