سرینگر/20 جون
وزیر اعظم نریندر مودی بین الاقوامی یوم یوگا کی تقریبات میں حصہ لینے کےلئے جمعرات کو سری نگر پہنچیں گے۔
وزیر اعظم آج سرینگر میں شیر کشمیر انٹرنیشنل کانفرنس سینٹر (ایس کے آئی سی سی) میں’نوجوانوں کو بااختیار بنانا، جموں و کشمیر کو تبدیل کرنا‘ پروگرام میں شرکت کریں گے۔
وہ جموں و کشمیر میں 1500 کروڑ روپے سے زیادہ مالیت کے متعدد ترقیاتی پروجیکٹوں کا افتتاح اور سنگ بنیاد رکھیں گے۔ وہ 1800 کروڑ روپے کی لاگت سے زراعت اور متعلقہ شعبوں میں مسابقتی بہتری پروجیکٹ (جے کے سی آئی پی) کا بھی افتتاح کریں گے۔
21 جون کو صبح تقریباً 6.30 بجے وزیر اعظم سرینگر میں ایس کے آئی سی سی میں 10 ویں بین الاقوامی یوم یوگا پروگرام میں شرکت کریں گے۔
پریس انفارمیشن بیورو کے ایک سرکاری بیان میں کہا گیا ہے کہ وزیر اعظم اس موقع پر اجتماع سے خطاب کریں گے اور اس کے بعد سی وائی پی یوگا سیشن میں حصہ لیں گے۔
وزیر اعظم کے دو روزہ دورہ کشمیر کےلئے سیکورٹی کے سخت انتظامات کئے گئے ہیں۔ عہدیداروں نے بتایا کہ جمعہ کے روز ڈل جھیل کے کنارے یوگا کرنے میں 7000 سے زیادہ شرکا ان کے ساتھ شامل ہوں گے۔
عہدیداروں نے بتایا کہ شرکاءکو گزشتہ تین دنوں سے یوگا ’آسن‘ کی تربیت دی گئی ہے جو وزیر اعظم کے ذریعہ انجام دیئے جائیں گے۔انہوں نے بتایا کہ وزیر اعظم کے دورے کو پرامن طریقے سے انجام دینے کو یقینی بنانے کے لئے سرینگر شہر میں سیکورٹی فورسز کے جوانوں کو بڑی تعداد میں تعینات کیا گیا ہے۔انہوں نے بتایا کہ ایس کے آئی سی سی کی طرف جانے والی سڑکوں کو سیل کردیا گیا ہے۔
انہوں نے بتایا کہ ایس کے آئی سی سی میں صفائی کا آپریشن منگل کو اختتام پذیر ہوا اور ایس کے آئی سی سی کے تمام عہدیداروں ، سیکورٹی اہلکاروں اور ڈیوٹی پر موجود دیگر افراد اور کھلاڑیوں کے پس منظر کی سیکیورٹی چیکنگ کی گئی۔
سری نگر پولیس نے حفاظتی اقدامات کے ایک حصے کے طور پر شہر کو ڈرون اور کواڈ کاپٹروں کے آپریشن کے لئے ’عارضی ریڈ زون‘ قرار دیا ہے۔
سرینگر پولیس نے 18 جون کو ایک بیان میں کہا کہ ڈرون رولز 2021 کے رول 24 کی دفعات کے مطابق سرینگر شہر کو ڈرون ز اور کواڈ کوپٹرز کے آپریشن کے لئے فوری طور پر ’عارضی ریڈ زون‘ قرار دیا گیا ہے۔
پولیس کا کہنا ہے کہ’ریڈ زون‘ میں تمام غیر مجاز ڈرون کارروائیوں پر ڈرون قوانین کی دفعات کے مطابق جرمانہ عائد کیا جا سکتا ہے۔
عہدیداروں نے بتایا کہ جمعہ کو مرکزی تقریب سے پہلے شہر اور وادی کے دیگر مقامات پر پچھلے تین دنوں میں یوگا کی متعدد تقریبات کا انعقاد کیا گیا ہے۔انہوں نے بتایا کہ یہاں لال چوک سٹی سینٹر میں مشہور کلاک ٹاور کے قریب یوگا کی ایک تقریب منعقد کی گئی جبکہ بدھ کو پولو گراو¿نڈ میں ایک میگا یوگا کیمپ کا انعقاد کیا گیا۔
عہدیداروں نے بتایا کہ یہاں ایس کے آئی سی سی میں ایک اور تقریب کا بھی انعقاد کیا گیا ، انہوں نے مزید کہا کہ 10 ویں آئی وائی ڈی کی تقریبات کے موقع پر وادی میں کئی مقامات پر اسی طرح کی تقریبات کا انعقاد کیا گیا تھا۔ (ایجنسیاں)
