نئی دہلی/۸جون
نامزد وزیر اعظم نریندر مودی کی قیادت میں قومی جمہوری اتحاد (این ڈی اے ) حکومت کی تیسری مدت کے لیے حلف برداری کی تقریب میں شرکت کے لیے سات پڑوسی ممالک کے لیڈروں کو مدعو کیا گیا ہے ۔
وزارت خارجہ کے مطابق ہندوستان کی پڑوسی فرسٹ پالیسی اور سی ویژن کے پیش نظر، نیپال، بھوٹان، بنگلہ دیش، سری لنکا، مالدیپ، سیشلز اور ماریشس کے رہنماوں کو اتوار کی شام 7 بجے راشٹرپتی بھون میں مودی کی تیسری مدت کے لیے حلف برداری کی تقریب میں شرکت کے لئے دعوت نامہ بھیجا گیا ہے ۔
نیپال کے وزیر اعظم پشپا کمل دہل پرچنڈ، بھوٹان کے وزیر اعظم شیرنگ ٹوبگے ، بنگلہ دیش کی وزیر اعظم شیخ حسینہ، سری لنکا کے صدر رانیل وکرماسنگھے ، مالدیپ کے صدر محمد معیزو، سیشلز کے نائب صدر احمد عفیف اور ماریشس کے وزیر اعظم پروِند جگناوتھ نے دعوت نامہ قبول کرلیا ہے ۔
وزارت خارجہ کے مطابق مہمان قائدین کی آمد کا سلسلہ ہفتہ سے شروع ہوگا۔ اتوار کی شام حلف برداری کی تقریب میں شرکت کے بعد یہ تمام رہنما راشٹرپتی بھون میں منعقدہ ضیافت میں شرکت کریں گے ۔
مودی کی پیر کو ان کے ساتھ دو طرفہ ملاقات کا بھی امکان ہے ۔
ا س دوران مودی کی حلف برداری تقریب میں شرکت کےلئے بنگلہ دیش کے وزیر اعظم شیخ حسینہ دہلی پہنچ گئیں۔
