موسم خوشگوار ہے ‘ابھی گرمائی تعطیلات نہیں ہوں گی :حسین

گاندربل//
ڈائریکٹر اسکول ایجوکیشن کشمیر تصدق حسین نے چہارشنبہ کے روز کہا کہ وادی کشمیر کے اسکولوں میں موسم گرما کی تعطیلات کا اعلان کرنے کا فی الحال کوئی منصوبہ نہیں ہے کیونکہ ’موسم خوشگوار ہے‘۔
حسین نے یہ بھی کہا کہ کشمیر میں اسکولوں کے اوقات میں کسی تبدیلی کی کوئی تجویز نہیں ہے۔
ناظم تعلیمات نے صحافیوں سے بات چیت کے دوران کہا’’موسم خوشگوار ہے‘ یہ۳۲ ڈگری سینٹی گریڈ ہے‘‘۔
حسین نے کہا کہ حکومت صورتحال پر نظر رکھے ہوئی ہے اور وہ کسی بھی شدید موسمی صورتحال کی صورت میں فیصلہ کریگی۔
ناظم تعلیمات نے کہا کہ ان کا محکمہ طالب علموں کو موسمی بے قاعدگیوں اور دیگر مشکل حالات کیلئے لچکدار بنانا چاہتا ہے تاکہ وہ مستقبل میں کسی بھی مشکل صورتحال کا مقابلہ کرنے کے لئے مضبوط بن سکیں۔
حسین کا کہنا تھا کہ اگر گرمیوں کی تعطیلات کا اعلان مئی کے مہینے میں کیا جاتا ہے تو’’ہم جون، جولائی کے مہینوں میں کیا کرنے جا رہے ہیں‘‘؟
ناظم تعلیمات کا یہ بیان ایسے وقت میں سامنے آیا ہے جب شمالی ہندوستان میں گرمی کی لہر چل رہی ہے اور وادی کشمیر میں بھی درجہ حرارت معمول سے زیادہ ہے۔