جموں میں کشمیری پنڈت ووٹروں کیلئے۲۳پولنگ مراکز قائم

جموں//
لوک سبھا الیکشن کے چوتھے مرحلے کے پیش نظر الیکشن کمیشن آف انڈیا نے جموں کے مختلف علاقوں میں کشمیری پنڈت مہاجر رائے دہندگان کیلئے۲۳پولنگ مراکز قائم کئے ہیں۔
بتادیں کہ لوک سبھا انتخابات کے چوتھے مرحلے میں کشمیر کی تین لوک سبھا سیٹوں میں سے۱۳مئی کو سری نگر لوک سبھا سیٹ کے لئے پولنگ ہوگی۔
سرکاری ذرائع نے بتایا کہ الیکشن کمیشن آف انڈیا نے جموں میں کشمیری پنڈت مہاجر ووٹروں کیلئے۲۳پولنگ مراکز قائم کئے ہیں جن میں۲معاون پولنگ مراکز شامل ہیں۔انہوں نے کہا کہ کمیشن کی گائیڈ لائنز کے مطابق۱۵سوسے زیادہ ووٹروں کے لئے معاون پولنگ مراکز قائم کرنا لازمی ہے ۔
ذرائع کے مطابق سری نگر لوک سبھا سیٹ کیلئے کشمیری پنڈت ووٹروں کی تعداد زائد از۱۳ہزار ہے جو۱۳مئی کو جموں کے مختلف حصوں میں قائم ۲۳پولنگ مراکز پر اپنا ووٹ ڈالیں گے ۔
ذرائع نے کہا کہ اس دوران سری نگر کے ریٹرنگ افیسر کو کشمیری پنڈت ووٹروں کے۴۷۳پوسٹل بیلٹ بھیجے گئے ہیں۔ان کا کہنا تھا’’یہ پوسٹل بیلٹس ملک بھر میں مقیم کشمیری پنڈت ووٹروں کے ہیں جنہوں نے پہلے ہی حق رائے دہی استعمال کرنے کے لئے رجسٹریشن کرائی ہے ‘‘۔
بتادیں کہ۱۸حلقوں پر مشتمل سری نگر لوک سبھا سیٹ کیلئے ۱۳مئی کو پولنگ ہوگی۔
حکام کے مطابق ہموار پولنگ کو یقینی بنانے کیلئے ۲۲۹پولنگ مراکز قائم کئے گئے ہیں۔
اس سیٹ کے لئے کل۲۴؍امید وار میدان میں ہیں جن میں سے نیشنل کانفرنس کے آغا روح اللہ اور پی ڈی پی کے وحید الرحمان اور جموں وکشمیر اپنی پارٹی کے اشرف میر کے درمیان کانٹے کی ٹکر متوقع ہے ۔