سرینگر/۴مارچ
بی جے پی جموں وکشمیر یونٹ کے صدر رویندر رینا کا کہنا ہے کہ سری نگر کے بخشی اسٹیڈیم میں 7 مارچ کو منعقد ہونے والی وزیر اعظم نریندر مودی کی ریلی میں زائد از 2 لاکھ لوگوں کی شرکت متوقع ہے ۔
رینا نے کہا کہ وزیر اعظم کے اس دورے کے پیش نظر کشمیر میں اس وقت جشن کا ماحول ہے ۔
بی جے پی یونت صدر نے ان باتوں کا اظہار پیر کو یہاں ایک پریس کانفرنس سے خطاب کے دوران کیا۔
رینا نے کہا”وادی کشمیر کے لوگوں کےلئے خوشی کی بات ہے کہ وزیر اعظم نریندر مودی جی۷مارچ کو یہاں آ رہے ہیں، اس دورے کے دوران بخشی اسٹیڈیم میں ان کی ریلی میں زائد از دو لاکھ لوگ شرکت کریں گے“۔
ان کا کہنا تھا کہ وزیر اعظم کے دورے کے پیش نظر وادی میں جشن کا ماحول ہے اور یہاں خوشی کی ایک لہر ہے ۔
رینا نے کہا کہ سال 2003 میں جب اس وقت کے وزیر اعظم آنجہانی اتل بہاری واجپائی جی یہاں آئے تھے تو اس وقت بھی اسی اسٹیڈیم میں لوگوں کا سیلاب امڈ آیا تھا اور اس کے بعد سال 2015 میں جب مودی جی یہاں آئے تو اس وقت بھی شیر کشمیر اسٹیڈیم میں لوگوں اژدھام جمع ہوا تھا۔
بی جے پی یونٹ صدر نے کہا”سال 2014 میں جب کشمیر میں خطرناک سیلاب آیا تو اس مشکل وقت میں بھی وزیر اعظم نریندر مودی جی یہاں آئے حالانکہ دیوالی کا تہوار تھا انہوں نے وہ اپنے ساتھیوں کے ساتھ نہیں منایا بلکہ یہاں لالچوک آئے اور 80 ہزار کروڑ روپیوں کے پیکیج کا اعلان کیا“۔
ان کا کہنا تھا کہ اسی پیکیج کے نتیجے میں کشمیر اس مشکل صورتحال سے باہر نکل سکا۔
رینا نے کہا کہ وزیر اعظم نریندر مودی کی قیادت میں جموں کشمیر نے ہر شعبے میں ترقی کی اور ان کی قیادت کی بدولت یہاں امن و آشتی اور بھائی چارے کا ماحول قائم ہے ۔
بی جے پی لیڈر نے کہا”ہمیں امید ہے کہ آنے والے انتخابات میں بھی کشمیر کے لوگ بی جے پی کی بھر پور حمایت کریں گے “۔ان کا کہنا تھا کہ بی جے پی جموں و کشمیر کی تمام پارلیمانی نشستوں پر اپنے امید وار کھڑا کرے گی اور باقی امید واروں کا اعلان بھی بہت جلد کیا جائے گا۔
بتادیں کہ بی جے پی نے جموں اور اودھم پور پارلیمانی نشستوں کےلئے اپنے امیداروں کا اعلان کیا ہے ۔
وزیر اعظم کی طرف سے ریاستی درجے کی بحالی کے متعلق ممکنہ اعلان کے بارے میں پوچھے جانے پر مسٹر رینا نے کہا کہ جو بھی اعلان کیا جائے گا لوگ اس کو ریلی میں سنیں گے ۔
