ترقی یافتہ ہندوستان’ کے ہدف کو حاصل کرنے میں صنعت کا کردار اہم: سیتا رمن

نئی دہلی// وزیر خزانہ نرملا سیتا رمن نے آج کہا کہ 2047 تک ترقی یافتہ ہندوستان کے ہدف کو حاصل کرنے میں ہندوستانی صنعت کا کردار اہم ہے ۔
صنعت نے جدوجہد آزادی میں نوآبادیاتی دباؤ کے باوجود صلاحیت پیدا کی۔ اب وقت آگیا ہے کہ ‘ترقی یافتہ ہندوستان’ کے ہدف کے ساتھ معاشی آزادی حاصل کریں اور صنعتی دنیا کو اس میں اپنا کردار ادا کرنا چاہیے ۔
یہاں ایف آئی سی سی آئی کی طرف سے منعقدہ قومی کانفرنس ‘فکی ڈیولپمنٹ انڈیا2047’ سے خطاب کرتے ہوئے محترمہ سیتا رمن نے کہا کہ وزیر اعظم نے واضح طور پر اشارہ کیا ہے کہ مستقبل کی نسلوں کو ایک بہتر ہندوستان فراہم کرنے کے لیے ایک ترقی یافتہ ہندوستان کا ہدف حاصل کرنا ہے ۔ محترمہ سیتا رمن نے کہا کہ ہندوستان اب دنیا کی پانچویں سب سے بڑی معیشت بن گیا ہے اور تیسری سب سے بڑی معیشت بننے کی راہ پر گامزن ہے ۔ انہوں نے صنعت کو یہ بھی یقین دلایا کہ حکومت کی جانب سے گزشتہ چند برسوں میں کی گئی اصلاحات جاری رہیں گی۔
وزیر خزانہ نے کہا کہ کچھ ایسے شعبے ہیں جہاں حکومت اختراعات، سرمایہ کاری اور پالیسی اصلاحات پر زیادہ زور دے گی۔ ان میں ای وی، اسپیس، اے آئی، ویئرہاؤسنگ، لاجسٹکس، زرعی ویلیو ایڈیشن اور زرعی کارکردگی، سیاحت، گرین ہائیڈروجن شامل ہیں۔ انہوں نے کہا کہ "ہندوستان کی لاجسٹک صلاحیت کو ابھی تک چھوا تک نہیں گیا ہے ۔ ہمارے پاس اس میں بے پناہ صلاحیت ہے ۔’’
محترمہ سیتا رمن نے ڈیجیٹل انفراسٹرکچر کی صلاحیت کو بھی اجاگر کیا جو ترقی یافتہ ہندوستان کے حصول میں ہندوستان میں اہم رول ادا کرے گا۔ انہوں نے کہا کہ "پیداوار کے دیگر عوامل کے علاوہ، 21ویں صدی ایک اور عنصر لے کر آئی ہے – ڈیجیٹل انفراسٹرکچر،”۔ وزیر خزانہ نے کہا کہ حکومت سرمائے کے اخراجات میں اضافہ کر کے اپنے عزم کا اظہار کر رہی ہے اورصنعت سے توسیع کرنے اور دنیا بھر میں زیادہ سے زیادہ مشترکہ منصوبے تلاش کرنے کی اپیل کی۔
انہوں نے کہا کہ ہندوستانی صنعت یقینی طور پر اب تیز رفتاری سے آگے بڑھ سکتی ہے ۔ ہم ہندوستان کی تاریخ کے اس مقام پر ہیں جہاں تمام مواقع موجود ہیں اور ہمیں حاصل ہیں۔