خانیار میں تین منشیات فروش ممنوع نشیلی اشیاء سمیت گرفتار:پولیس

سرینگر//
منشیات کا کاروبار کرنے والوں کے خلاف اپنا کریک ڈاون جاری رکھتے ہوئے سرینگر پولیس نے منور آباد چوک خانیار میں تین منشیات فروشوں کو گرفتار کر کے ان کے قبضے سے ممنوع نشیلی اشیاء برآمد کرکے ضبط کی ہے ۔
پولیس کے ایک ترجمان نے بتایا کہ ایس ایچ او خانیار کی سربراہی میں پولیس ٹیم نے منور آباد چوک نزدیک بابا داود خاکی پل کے نزدیک تین مشتبہ افراد کو روک کر ان کی تلاشی لی جس دوران ان کے قبضے سے۹ء۱کلو گرام چرس پاوڈر اور دوسرا سامان برآمد ہوا۔
ترجمان نے بتایا کہ پولیس نے تینوں کو دھر دبوچ کر سلاخوں کے پیچھے دھکیل دیا۔
منشیات فروشوں کی شناخت اویس حسین میر ولد سجاد حسین میر ساکن ٹنگہ باغ خانیار، عدنان گلزار نجار ولد گلزار احمد ساکن بابا پورہ حبہ کدل حال گاندربل بٹہ ونی، اور ریحان شیخ ولد لال میا شیخ ساکن مغربی بنگال حال شمسواری فتح کدل کے بطور ہوئی ہے ۔
دریں اثنا پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کریں۔
پولیس کا کہنا ہے کہ منشیات فروشی سماج کے لئے ناسور بن چکی ہے لہذا اس کا قلع قمع کرنے کی خاطر ہر ایک کو پولیس کے ساتھ اپنا دست تعاون فراہم کرنا چاہئے ۔
ادھر پولیس نے شمالی کشمیر کے ضلع بارہمولہ میں ایک بد نام زمانہ اور انتہائی مطلوب منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے اور اس کو سینٹرل جیل کوٹ بلوال جموں میں بند رکھا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ مجاز اتھارٹی سے اجازت حاصل کرنے کے بعد ایک بدنام زمانہ اور انتہائی مطلوب منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے اور اس کو سینٹرل جیل کوٹ بلوال جموں میں بند رکھا ہے ۔
بیان میں مذکورہ منشیات فروش کی شناخت ارشاد احمد گنائی ولد عبدالجبار گنائی ساکن سولندہ ٹنگمرگ بارہمولہ کے طور پر کی گئی ہے ۔
ترجمان نے کہا’’یہ بات قابل ذکر ہے کہ مذکورہ منشیات فروش کے خلاف کئی مقدمے درج ہیں اور وہ سولندہ، کھائی پورہ، ٹنگمرگ اور ضلع کے دوسرے علاقوں کے نوجوانوں کو منشیات سپلائی کرنے میں ملوث تھا‘‘۔
بیان میں کہا گیا کہ کئی مقدمے درج ہونے کے باوجود وہ اپنی حرکات سے باز نہیں آیا اور نوجوانوں کو منشیات سپلائی کرتا رہا۔
قابل ذکر ہے کہ بارہمولہ میں سال رواں کے پہلے مہینے یعنی ماہ جنوری کے دوران این ڈی پی ایس ایکٹ کے تحت۲۴مقدمے درج کرکے۳سخت گیر منشیات فروشوں سمیت۳۹منشیات فروشوں کو گرفتار کیا ہے اور ان کی تحویل سے لاکھوں روپیوں کا نشہ آور مواد ضبط کیا ہے ۔
ضلع میں منشیات کے خلاف وسیع پیمانے پر جنگ کو جاری رکھتے ہوئے پولیس نے سال۲۰۲۳کے دوران این ڈی پی ایس ایکٹ کے تحت۲۶۴مقدمے درج کرکے۴۶۴منشیات فروشوں کو گرفتار کیا۔