گلمرگ: برفانی تودے میں دبنے والے دو سیاحوں کو زندہ بچا لیا گیا

سرینگر//
شہرہ آفاق گلمرگ میں پیر کے روز برفانی تودا گر آنے کے نتیجے میں دو سیاح برف کے نیچے دب گئے تاہم بروقت کارروائی کے نتیجے میں انہیں بحفاظت نکالا گیا۔
اطلاعات کے مطابق شمالی کشمیر کے ضلع بارہ مولہ میں واقع شہرہ آفاق سیاحتی مقام گلمرگ کے افروٹ چوٹی پر پیر کے روز ایک برفانی تودا گر آیا تاہم کسی جانی نقصان کی کوئی اطلاع نہیں ہے ۔
حکام نے بتایا کہ پیر کی دوپہر بارہ بجے افروٹ چوٹی پر بھاری برکم برفانی تودا گر آیا جس کے نتیجے میں وہاں سیکنگ کرنے والے دو سیاح برف کے نیچے دب گئے چنانچہ سکائی پیٹرولنگ ٹیم کی قیادت کرنے والے غیر ملکی آفیسر‘ مسٹر برائن نیو مین’ نے فوری طورپر ریسکیو آپریشن شروع کیا اور پانچ منٹ کے اندر اندر ٹیم جائے وقوع پر پہنچی ۔
حکام نے مزید بتایا کہ ٹیم نے برف میں پھنسے ہوئے سیاحوں کو زندہ باہر نکالنے میں کامیابی حاصل کی۔
دریں اثنا گلمرگ میں اسکائنگ کرنے والے سیاحوں کو احتیاطی تدابیر پر من وعن عمل کرنے کی تلقین کی گئی ہے ۔
گنڈولہ کے جی تھری اسٹیشن سے آگے بڑھنے والے تمام سیاحوں (اسکائنگ کرنے والے )کے پاس تمام تر حفاظتی سامان ساتھ رکھنے کا بھی مشورہ دیا گیا ہے ۔