خشک سالی:سرینگر اور جنوبی کشمیر کے جنگلوں سے آگ نمودار

سرینگر//
وادی کشمیر کے جنگلی علاقوں میں آگ نمودار ہونے کا سلسلہ جاری ہے۔
ہفتے کی شام کو سرینگر اور جنوبی کشمیر کے متعدد جنگلی علاقوں سے آگ نمودار ہوئی جس نے وسیع وعریض علاقے کو لپیٹ میں لے لیا ہے۔
اطلاعات کے مطابق ہفتے کی شام کو سرینگر کے مضافاتی علاقے کھمبر سنگ ریشی کے جنگل سے آگ نمودار ہوئی جس نے آناً فاناً ایک وسیع علاقے کولپیٹ میں لے لیا۔
ایک مقامی شہری جاوید احمد نے خبر رساں ایجنسی کوبتایا کہ پچھلے دو روز سے کھمبر کا جنگلی علاقہ آگ کی لپیٹ میں آچکا ہے۔انہوں نے بتایا کہ چونکہ اوپری پہاڑ پر آگ نمودار ہوئی ہے لہذا فائر اینڈ ایمرجنسی محکمہ وہاں تک جانے سے قاصر ہے۔
احمد کا مزید کہنا تھا کہ جنگل کی دیکھ ریکھ سوشل فاریسٹری کا محکمہ کر رہا ہے لیکن پچھلے ۴۸گھنٹوں سے آگ نے جنگل میں تباہی مچائی ہوئی ہے۔مقامی شہری نے بتایا کہ آگ پر قابو پانے کی خاطر سنجیدہ نوعیت کے اقدامات اٹھانے کی ضرورت ہے۔ان کا مزید کہنا تھا کہ کوئلہ اسمگلنگ میں ملوث افراد بھی اس میں ملوث ہو سکتے ہیں۔
دریں اثنا ترال کے ناگہ پتھری ، دودھ مرگ اور پنگلش کے جنگلات میں بھی ہفتے کی شام کو آگ نمودار ہوئی۔
نامہ نگار نے بتایا کہ آگ نے جنگل میں تباہی مچائی ہوئی ہے جبکہ محکمہ جنگلی حیات کے اہلکار آگ بجھانے کی کارروائی میں مصروف ہے۔
فائر اینڈ ایمرجنسی محکمہ کے ایک عہدیدار نے یو این آئی اردوکو بتایا کہ ترال کے جنگلی علاقوں میں آگ بجھانے کی کارروائی شروع کی گئی ہے۔انہوں نے بتایا کہ خشک سالی کے نتیجے میں ہی جنگلوں سے آگ نمودار ہورہی ہے۔ان کے مطابق متعدد مقامات پر فائر اینڈ ایمرجنسی عملے کے اہلکار آگ بجھانے کی کارروائی میں مصروف ہے۔
اس سلسلے میں مزید تفصیلات کا انتظار ہے۔