محبوبہ کی کار کو حادثہ: پولیس کا کسی بھی سیکورٹی کوتاہی سے انکار

سرینگر//
جموںکشمیر پولیس نے جمعہ کو کہا کہ اس نے پی ڈی پی صدر محبوبہ مفتی نے ہر وقت ان کی حفاظت کو یقینی بنانے کیلئے ایک وسیع اور جدید حفاظتی انتظامات کیے ہیں۔
جاری ہونے والے ایک بیان میں پولیس ترجمان نے کہا کہ محبوبہ کی سکیورٹی میں ۳۴؍ اہلکاروں کی ایک ٹیم شامل ہے، جس کی قیادت انسپکٹر رینک کا چیف سکیورٹی آفیسر کر رہا ہے۔
ترجمان نے کہا کہ سکیورٹی فورس میں پرسنل سکیورٹی آفیسرز (پی ایس اوز) اور خصوصی طور پر تربیت یافتہ اہلکاروں کی ایک قریبی ٹیم شامل ہے۔ اس میں سڑک کے سفر پر ان کی حفاظت کو یقینی بنانے کے لئے نقل و حرکت پر حفاظت بھی شامل ہے۔
یہ بیان محبوبہ مفتی کی پارٹی اور کئی سیاست دانوں کی جانب سے ضلع اننت ناگ میں ایک سڑک حادثے میں بال بال بچ جانے کے بعد اٹھائے گئے خدشات کے تناظر میں سامنے آیا ہے۔
بیان کے مطابق محبوبہ کو نیم فوجی دستوں کے آٹھ اہلکاروں کی ڈبل حفاظت فراہم کی گئی ہے۔ کھمبر میں ان کی رہائش گاہ کی حفاظت نیم فوجی دستوں کی ایک مضبوط نفری کر رہی ہے۔ ان کے سکیورٹی قافلے میں متعدد گاڑیاں شامل ہیں، جن میں الیکٹرانک خطرات کو بے اثر کرنے کے لیے گاڑی پر نصب جیمر بھی شامل ہے۔
بیان میں مزید کہا گیا ہے کہ پارٹی کی جانب سے کھلے میڈیا میں زیڈ پلس سکیورٹی کے بارے میں کیے گئے کچھ دعوے حقائق کے مطابق درست نہیں ہیں۔ انہوں نے کہا،’مثالی طور پر سینئر پروٹیکٹڈ افراد کی سکیورٹی کے انتظامات پر عوامی سطح پر بات نہیں کی جاتی۔ تاہم، پی ڈی پی کے پارٹی عہدیداروں سمیت ہمارے محافظوں کو یہ یقین دلانا ضروری ہو گیا ہے کہ محبوبہ مفتی کیلئے سیکورٹی کے انتظامات بہت اچھے تھے اور اب بھی ہیں۔