رام مخالف طاقتوں کی بربادی طے : بی جے پی

نئی دہلی// بھارتیہ جنتا پارٹی (بی جے پی) نے اجودھیا میں شری رام مندر کو لے کر نیشنلسٹ کانگریس پارٹی (این سی پی) کے ایک لیڈر کے قابل اعتراض تبصرے پر ردعمل ظاہر کرتے ہوئے آج کہا کہ مسلمانوں کی خوشامد کی سیاست کرتے ہوئے رام مندر مخالف قوتیں ڈوبنے والی ہیں۔
بی جے پی کے ترجمان ڈاکٹر سدھانشو ترویدی نے یہاں پارٹی ہیڈکوارٹر میں ایک پریس کانفرنس میں این سی پی (شرد دھڑے ) کے ایم ایل اے جتیندر آوہاڈ کی جانب سے بھگوان رام کو گوشت خوربتائے جانے کے بعد پیدا تنازعہ اور بعد میں معافی مانگنے کے بارے میں پوچھے جانے پر کہا کہ شری رام مندر پران پرتیشٹھا پرمثبت رویہ کے بجائے اپوزیشن کے لوگ آج بھی خلل پیدا کرنے کے طریقے ڈھونڈ کرخلل ڈال کر مطمئن ہو رہے ہیں۔ انہوں نے کہا کہ رام راجیہ میں اور رام کے بھکتوں میں کوئی امتیاز یا عدم مساوات نہیں ہے ، لیکن اپوزیشن لیڈروں کے ذہنوں میں عدم مساوات ہے اور اسی وجہ سے وہ وہی پرانے قابل اعتراض بہانوں پر قائم ہیں۔
مسٹرترویدی نے رام مندر کے مخالفین کے بارے میں کہا کہ ملک کتنا بدل گیا ہے لیکن وہ اب بھی مسلمانوں کی خوشنودی کی کشتی پر سوار ہیں۔ یہ لوگ سمجھ ہی نہیں سکے کہ اس ملک کی زندگی کی توانائی کہاں ہے ، اس زندگی اور توانائی کو نہ سمجھنے کی وجہ سے یہ لوگ سیاسی نقطہ نظر سے بے جان ہوتے چلے گئے ۔
اپوزیشن لیڈروں کی پالیسی پر طنز کرتے ہوئے انہوں نے غلام محمد قاصر کا ایک شعر پڑھا۔
‘‘کشتی بھی نہیں بدلی، دریا بھی نہیں بدلا۔
ڈوبنے والوں کا، جذبہ بھی نہیں بدلا۔
(ہے شوق سفر ایسا اک عمر سے یاروں نے )
منزل بھی نہیں پائی، رستہ بھی نہیں بدلا۔”
بہار کے وزیر اعلیٰ اور جنتا دل یونائیٹڈ کے صدر نتیش کمار کے انڈیا اتحاد کا کنوینر بننے کی قیاس آرائیوں کے بارے میں پوچھے جانے پر مسٹر ترویدی نے طنزیہ انداز میں کہا کہ یہ معلوم کیا جانا چاہئے کہ اتحاد میں کتنی پارٹیاں ان کے حق میں ہیں اور کتنی نہیں ہیں۔
اس سے قبل عام آدمی پارٹی کے لیڈر اور دہلی کے وزیر اعلیٰ کے بارے میں تبصرہ کرتے ہوئے مسٹر ترویدی نے کہا کہ محلہ کلینک کے بارے میں تحقیقات میں دھوکہ دہی کا انکشاف ہوا ہے کہ ایسے کلینک میں صبح 9 بجے سے دوپہر 1 بجے تک ایک دن میں 240 منٹ کے دوران 500 سے زائد مریضوں کی جانچ کی جاتی رہی ہے ۔ انہوں نے کہا کہ ایک بیرونی ایجنسی کی تحقیقاتی رپورٹ میں کہا گیا ہے کہ نامعلوم مریضوں کے ہزاروں ٹیسٹ کیے گئے جن کا کوئی ریکارڈ نہیں ہے ۔ جبکہ وزیر اعظم نریندر مودی کی ہر اسکیم میں استفادہ کنندہ کا مکمل ڈیٹا دستیاب ہے ۔