ٹنگمرگ:کنویں میں گرنے والے شخص کودس گھنٹے کے بعد زندہ باہر نکالا گیا

سرینگر/۲۸دسمبر
شمالی ضلع بارہ مولہ کے برزلہ کنزر ٹنگمرگ علاقے میں کنویں کی صفائی کے دوران جو45سالہ شخص اس میں گرا تھا اسے کنویں سے باہر زندہ نکالا گیا ہے ۔
معلوم ہوا ہے کہ مقامی لوگوں نے فوری طور پولیس کو اس بارے میں مطلع کیا چنانچہ ایس ڈی آر ایف اور پولیس ٹیمیں فوری طورپر جائے موقع پر پہنچی اور امدادی کارروائی شروع کی۔
جمعرات شام ساڑھے سات بجے کنویں میں گرنے والے شخص کو زندہ باہر نکالا گیا ۔
اطلاعات کے مطابق کنزر ٹنگمرگ کے برزلہ گاوں میں جمعرات کی صبح اس وقت سراسیمگی پھیل گئی جب کنویں کی صفائی کے دوران 45سالہ شخص جس کی شناخت بشیر احمد راتھر کے بطور ہوئی ہے پیر پھسل جانے کے نتیجے میں کنویں میں جاگرا۔
نامہ نگار نے بتایا کہ مقامی لوگوں نے گر چہ مذکورہ شخص کو کنویں سے نکالنے کی جی توڑ کوشش کی تاہم وہ اس میں ناکام ثابت ہوئے جس کے بعد پولیس اور ایس ڈی آرایف کی ٹیمیں جائے وقوع پر پہنچی۔
انہوں نے بتایا کہ کنویں کی گہرائی کے باعث ریسکیو ٹیموں کو 45سالہ شخص کو کنویں سے باہر نکالنے میں دقتوں کا سامنا کرناپڑا۔
مقامی ذرائع کے مطابق ضلعی انتظامیہ کے سینئر آفیسران جائے موقع پر پہنچے اور جدید مشینری کے ذریعے مذکورہ شخص کو کنویں سے باہر نکالنے کی خاطر امدادی آپریشن تیز تر کیا گیا ہ۔
جمعرات شام ساڑھے سات بجے کے قریب دس گھنٹے کی انتھک کوشش کے بعد اس شخص کو کنویں سے زندہ باہر نکالا گیا ۔
معلوم ہوا ہے کہ بشیر احمد راتھر کو فوری طورپرہسپتال لے جایاگیا جہاں پر اس کی حالت مستحکم بتائی جارہی ہے ۔
دریں اثنا مقامی لوگوں نے پولیس، فوج، فائر اینڈ ایمرجنسی ، ایس ڈی آر ایف اور تحصیلدار کا اس بات پر شکریہ ادا کیا کہ انہوں نے دن بھر ریسکیو آپریشن جاری رکھا جس وجہ سے مقامی شہری کو دس گھنٹے کے بعد کنویں سے زندہ باہر نکالا گیا۔