‘
سرینگر/۹نومبر
انسپکٹر جنرل آف پولیس (آئی جی پی)، کشمیر، وی کے بردی نے جمعرات کو ڈی آئی جی رینجز اور ضلعی ایس پیز کو ہدایت دی کہ وہ دہشت گردی کے ماحولیاتی نظام کو ختم کرنے کیلئے دہشت گردی کے جرائم اور منشیات سے متعلق معاملات میں معیاری تفتیش پر توجہ دیں۔
بردی نے آج سہ پہر منعقدہ ایک میٹنگ میں یہ ہدایات جاری کیں۔
ایک سرکاری بیان کے مطابق آئی جی پی کشمیر نے افسران پر زور دیا کہ وہ پولیس اسٹیشن اور سب ڈویڑنل سطح پر پولیسنگ کے مجموعی کام میں بہتری کو یقینی بنائیں اور ریکارڈ کی تعمیر اور تفتیش میں بہتری لائی جائے۔
بردی نے افسران پر زور دیا کہ وہ اچھے تعلقات عامہ بنائیں اور لوگوں کی حساس پولیسنگ پر توجہ دیں۔ عوامی شکایات کا ازالہ ان کے آپریشنل اور جرائم سے متعلق وعدوں کے علاوہ وادی پولیس کی اولین ترجیح ہونی چاہیے۔
آئی جی نے وادی میں تمام سکیورٹی ایجنسیوں کے ساتھ تال میل کے ساتھ شفاف اور موثر پولیسنگ پر زور دیا۔
اس سے پہلے بردی نے انسپکٹر جنرل آف پولیس (آئی جی پی) کشمیر زون کی حیثیت سے جمعرات کی صبح باقاعدہ اپنا عہدہ سنبھالا۔
بردی کو ایڈیشنل ڈائریکٹر جنرل آف پولیس (اے ڈی جی پی) کشمیر وجے کمار کو اے ڈی جی پی (لا اینڈ آرڈر) جموں وکشمیر ٹرانسفر کرنے کے بعد اس عہدے پر تعینات کیا گیا تھا۔
۷نومبر کو جاری سرکاری حکمنامے کے مطابق علاوہ ازیں سال۲۰۰۳کے آئی پی ایس افسر ودھی کمار آئی جی پی کشمیر کے علاوہ اگلے احکامات تک آئی جی پی آرمڈ پولیس کشمیر کے عہدے پر بھی براجمان رہیں گے ۔
قابل ذکر ہے کہ وجے کمار اب تک کشمیر میں پولیس سربراہ کی حیثیت سے سب سے زیادہ۴برسوں تک اپنے فرائض انجام دینے والے پولیس افسر ہیں۔
