امراض دل کے بروقت علاج سے۸۵فیصد اموات کو روکا جا سکتا ہے:ڈاکٹر آہنگر

سرینگر//
شیر کشمیر انسٹی ٹیوٹ آف میڈیکل سائنسز (ایس کے آئی ایم ایس) صورہ سری نگر کے سابق ڈائریکٹر ڈاکٹر اے جی آہنگر کا کہنا ہے کہ امراض دل کے بروقت علاج سے۸۵فیصد اموات کو روکا جا سکتا ہے ۔
ڈاکٹر آہنگر نے کہا کہ دنیا میں سالانہ ۷ء۱کروڑ لوگ دل کی بیماریوں میں مبتلا ہو کر مر جاتے ہیں۔
سابق ڈائریکٹر نے ان باتوں کا اظہار جمعہ کو یہاں ایک تقریب کے حاشیہ پر نامہ نگاروں کے ساتھ بات کرنے کے دوران کیا۔انہوں نے کہا’’اس سال عالمی یوم قلب کا تھیم ’یوزڈ ہارٹ نو ہارٹ‘ہے ، دنیا میں سالانہ۷ء۱کروڑ لوگ دل کی مختلف بیماریوں کے باعث مر جاتے ہیں‘‘۔ان کا کہنا تھا’’اگر دل کے تکالیف کا بر وقت علاج کیا جائے تو۸۵فیصد اموات کو روکا جا سکتا ہے‘‘۔
ڈاکٹر آہنگر نے کہا کہ دنیا کی کل اموات میں سے۲۷سے۳۱فیصد لوگوں کی دل کی بیماریوں میں مبتلا ہونے موت ہوتی ہے ۔انہوں نے کہا کہ دل کی بیماریوں میں مبتلا ہونے سے بچنے کے لئے نمک کا کم استعمال، چینی کا کم استعمال، تمباکو نوشی سے مکمل احتراز، تفریحی سرگرمیوں میں حصہ لینے اور ذہنی دبائو سے بچنے وغیرہ کے فارمولے پر عمل کرنا از بس ضروری ہے ۔
قابل ذکر ہے کہ دنیا میں۲۹ستمبر کو عالمی یوم قلب کے طور پر منایا جاتا ہے ۔ یہ دن دل کی بیماریوں کے بچائو اور ان کے اثرات کے بارے میں عوامی بیداری بڑھانے کی غرض سے منایا جاتا ہے اور اس دن کی مناسبت سے سمیناروں کا انعقاد کیا جاتا ہے جن میں دل سے متعلق امراض سے بچائو کی تدابیر و علاج جیسے موضوعات پر بات کی جاتی ہے ۔
۔۔۔۔۔۔۔۔۔