اگنیور بھرتی ریلی‘ منتخب ہونے کیلئے کسی کو رشوت نہ دیں

جموں//
جموں کے مضافاتی علاقہ اکھنور میں واقع ملٹری اسٹیشن پر دو ہفتوں پر محیط اگنیور بھرتی ریلی سے قبل فوج نے ایک ایڈوائزری جاری کرتے ہوئے اس ریلی میں حصہ لینے والے امیدواروں کو منتخب ہونے کیلئے کسی کو رشوت دینے سے باز رہنے کی ہدایات دی ہیں۔
فوج کا کہنا ہے کہ اس میں بھرتی خالص طور پر میرٹ کی بنیاد پر کی جائے گی۔
جموں نشین دفاعی ترجمان لیفٹیننٹ کرنل‘ سنیل برتوال نے اپنے ایک بیان میں کہا’’امیدواروں کو ہدایت دی جا رہی ہے کہ وہ منتخب ہونے کیلئے کسی کو رشوت نہ دیں کیونکہ بھرتی خالص طور پر میرٹ کے بنیاد پر کی جائے گی‘‘۔
ترجمان نے کہا کہ بھرتی کے دوران سلیکشن عمل تمام مراحل پر کمپیوٹرائزڈ اور شفاف ہوگا۔
کرنل برتوال نے امیدواروں سے ٹائوٹس سے ہوشیار رہنے کی سخت تاکید کرتے ہوئے کہا کہ وہ ان (امیدواروں) کی کسی بھی مرحلے پر کوئی مدد نہیں کر سکتے ہیں۔
دفاعی ترجمان نے امیدواروں سے جعلی داخلہ کارڈ اپنے ساتھ نہ رکھنے کی بھی تاکید کی کیونکہ ایسا کرنے سے ان کو نا اہل قرار دیا جا سکتا ہے ۔
کرنل برتوال نے کہا کہ جن امیداروں کے پاس جعلی داخلہ کارڈ ہوں گے ان کو مزید تادیبی کارروائی کیلئے پولیس کے حوالے کیا جائے گا۔
امیداروں سے کہا گیا ہے کہ وہ اپنے ساتھ کمپیوٹرائزڈ داخلہ کارڈ رکھیں۔
لیفٹیننٹ کرنل بارتوال نے کہا کہ جن امید واروں نے۲۱نومبر سے۲دسمبر تک ہونے والی اس ریلی کیلئے درخواستیں جمع کی ہیں وہ۷نومبر سے اپنے رجسٹرڈ ای میل آئی ڈی سے اپنے داخلہ کارڈ ڈائون لوڈ کرسکتے ہیں اور ریلی میں شرکت کرنے کیلئے اس کارڈ کو اپنے ساتھ رکھنا لازمی ہے ۔
کرنل برتوال نے کہا کہ امیدواروں کو چاہئے کہ وہ بارش اور پانی سے بچانے کیلئے داخلہ کارڈ کو پلاسٹک کور میں رکھیں۔
ترجمان کا کہنا تھا کہ ریلی میں داخلہ۴بجے نیم شب سے شروع ہوگا اور صبح۷بجے گیٹ بند کئے جائیں گے ۔
امید واروں سے کہا گیا ہے کہ وہ نوٹیفکیشن کے مطابق تمام دستاویزات اپنے ساتھ لائیں۔