شمالی ضلع کپوارہ میں تین جنگجو اعانت کار گرفتار:پولیس

سرینگر/28اپریل
جموں و کشمیر پولیس نے سرحدی ضلع کپوارہ میں سرحد پار سے اسلحہ و گولہ بارود اسمگل کرنے میں ملوث تین جنگجو اعانت کاروں کو گرفتار کرنے کا دعویٰ کیا ہے ۔
ایک پولیس ترجمان نے جمعرات کو اپنے ایک بیان میں تفصیلات فراہم کرتے ہوئے کہا کہ پولیس نے سرحد پار سے اسلحہ وگولہ بارود اسمگل کرنے اور اس کی نقل و حمل میں ملوث تین جنگجو اعانت کاروں کو گرفتار کیا ہے ۔
انہوں نے کہا کہ پولیس کو ایک مصدقہ اطلاع موصول ہوئی کہ جنگجو اعانت کاروں کا ایک ماڈیول وادی میں سرگرم جنگجو تنظیموں کے لئے کام کر رہا ہے اور وہ سرحد پار سے اسلحہ و گولہ بارود اسمگل کرنے میں ملوث ہے ۔
بیان میں کہا گیا کہ اس سلسلے میں پولیس اسٹیشن کرناہ کی ایک ٹیم نے کارروائی عمل میں لاتے ہوئے مختلف علاقوں سے تین جنگجو اعانت کاروں کو گرفتار کیا۔
گرفتار شدگان کی شناخت محمد عامر ولد محمد شکور کلاس، نثار احمد ولد منظور احمد کلاس ساکنان ہیجترا کرناہ اور کفیل احمد ولد مرحوم عبدالرحیم بٹ ساکن سدھ پورہ کرناہ کے بطور کی گئی ہے ۔
پولیس بیان میں کہا گیا کہ دوران پوچھ گچھ گرفتار شدگان کے انکشاف پر ایک چینی پستول، اس کا ایک میگزین اور 14 کاٹریج بر آمد کی گئیں۔
بیان میں کہا گیا کہ اس ضمن میں ایک کیس درج کرکے مزید تحقیقات شروع کی گئیں۔