ساتوک-چراغ کوریا اوپن کے کوارٹر فائنل میں

ییوسو// ساتوک سائراج رینکیریڈی اور چراغ شیٹی کی ہندوستانی مردوں کی ڈبلز جوڑی نے جمعرات کو چین کے ژاؤ ہاڈونگ اور ہے جیٹنگ کو شکست دے کر کوریا اوپن 2023 کے کوارٹر فائنل میں جگہ بنالی۔
دنیا کی تین نمبر کی جوڑی ساتوک-چراغ نے 43 منٹ تک جاری رہنے والے پری کوارٹر فائنل میں 16 ویں نمبر کی چینی جوڑی کو 21-17، 21-15 سے شکست دی۔ ساتوک-چراغ کی ہائیڈونگ-جیٹنگ کے خلاف یہ تیسری جیت ہے۔ کوارٹر فائنل میں ہندوستانی جوڑی کا مقابلہ جاپان کے تاکورو ہوکی اور یوگو کوبیاشی سے ہوگا۔
چینی جوڑی نے پہلے گیم میں ساتوک-چراغ کے لیے سخت مقابلہ پیش کیا اور انہیں وقفے پر صرف 11-10 کی برتری حاصل کرنے دیا۔ ہائیڈونگ-جیٹنگ نے یہاں تک کہ ایک موقع پر 13-12 کی برتری حاصل کی، لیکن ہندوستانی جوڑی نے مسلسل دو پوائنٹس بنائے اور اس کے بعد اپنے چینی حریفوں کو واپسی کا موقع نہیں دیا۔
پہلی گیم کے مقابلے میں دوسرا گیم ساتوک-چراغ کے لیے آسان تھا۔ چینی جوڑی پوائنٹس اسکور کرتی رہی لیکن کبھی بھی ساتوک-چراغ پر کوئی دباؤ نہیں ڈال سکی اور دوسرا گیم 21-15 سے ہارنے کے بعد ٹورنامنٹ سے باہر ہو گئی۔
دریں اثنا، ہندوستانی مردوں کے ڈبلز کھلاڑی ایچ ایس پرنئے اور پریانشو راجاوت اپنے اپنے میچ ہارنے کے بعد دوسرے مرحلے میں کوریا اوپن 2023 سے باہر ہو گئے۔
عالمی نمبر 10 پرنئے کو ایک گھنٹہ چھ منٹ تک جاری رہنے والے سخت مقابلے میں ہانگ کانگ کے لی چیوک یو کے ہاتھوں 15-21، 21-19، 18-21 سے شکست کا سامنا کرنا پڑا۔
پریانشو نے دنیا کے چوتھے نمبر کے کھلاڑی اور ٹاپ سیڈ جاپان کے کوڈائی ناراوکا سے سخت مقابلہ کیا لیکن وہ بھی ایک گھنٹہ 22 منٹ کے بعد 14-21، 21-18، 17-21 سے ہار گئے۔
ترشا جولی اور گایتری گوپی چند کو خواتین کے ڈبلز میچ میں جنوبی کوریا کی نا ہا بیک اور ہی سو لی کے ہاتھوں 11-21، 4-21 سے شکست کا سامنا کرنا پڑا۔ مکسڈ ڈبلز میں روہن کپور اور سکی ریڈی کی ہندوستانی جوڑی کو 35 منٹ میں 15-21 12-21 سے شکست کا سامنا کرنا پڑا۔
خیال ر ہے کہ پی وی سندھو اور کدامبی سری کانت پہلے مرحلے میں ہی ٹورنامنٹ سے باہر ہو چکے ہیں۔ ساتوک-چراغ اس ایونٹ میں ہندوستان کے آخری نمائندے ہیں۔