جموں بیس کیمپ سے یاتریوں کی کشمیر روانگی بدستورمعطل

جموں//
سرینگر‘جموں قومی شاہراہ بند رہنے کی وجہ سے شری امر ناتھ جی یاترا کیلئے یاتریوں کے جموں کے بھگوتی نگر بیس کیمپ سے کشمیر روانہ ہونے کا سلسلہ منگل کو چوتھے روز بھی معطل رہا۔
سرکاری ذرائع نے بتایا کہ قومی شاہراہ بند رہنے کی وجہ سے منگل کو بھی یاتریوں کو بھگوتی نگر بیس کیمپ سے کشمیر روانہ ہونے کی اجازت نہیں ہے ۔
ذرائع نے کہا کہ یاتریوں کے کسی بھی جھتے کو کشمیر روانہ ہونے کی اجازت نہیں ہے ۔
ذرائع نے بتایا کہ بھگوتی نگر بیس کیمپ پر قریب۷ہزار یاتری جبکہ ضلع رام بن کے چندر کوٹ میں زائد از۵ہزار یاتری درماندہ ہیں۔
انتظامیہ درماندہ یاتریوں کو سہولیات بہم پہنچانے کیلئے تمام تر اقدام کر رہی ہے ۔
دریں اثنا کشمیر میں قائم ننون پہلگام بیس کیمپ اور بالتل بیس کیمپ سے یاترا جاری ہے ۔
سرکاری ذرائع کے مطابق پہلے دس دنوں کے دوران زائد از ایک لاکھ یاتریوں نے پوتر گھپا کا درشن کیا ہے جو ایک ریکارڈ ہے ۔
۶۲دنوں پر محیط یہ سالانہ یاترا۳۱؍اگست کو اختتام پذیر ہوگی۔
جموں و کشمیر انتظامیہ اور شری امرناتھ شرائن بورڈ نے یاترا کے لئے فقید المثال انتظامات کئے ہیں۔