بنگلورو// ہندوستانی مردوں کی ہاکی ٹیم کے نائب کپتان ہاردک سنگھ نے کہا کہ یوگا ان کی زندگی کا ایک لازمی حصہ ہے اور اس نے ایف آئی ایچ مردوں کے ہاکی ورلڈ کپ 2023 کے دوران لگنے والی چوٹ سے صحت یاب ہونے میں بھی مدد کی۔
ہاکی انڈیا کے ساتھ بات چیت میں ہاردک نے کہا، "پہلی بار جب ہمیں یوگا سے متعارف کرایا گیا، ہم نے محسوس کیا کہ یہ اتنا فائدہ مند نہیں ہے اور ہمارے لئے تمام آسنوں کو صحیح طریقے سے کرنا آسان نہیں ہے۔ ہم میں سے بہت سے لوگ جم میں ایک گھنٹہ یوگا کرنا مناسب سمجھتے تھے، لیکن آخر کار ہمیں معلوم ہوا کہ یوگا پریکٹس نے توجہ کی طاقت کو بڑھانے میں زبردست مدد کی ہے۔
انہوں نے کہا، "آج، یوگا ہماری زندگی کا ایک لازمی حصہ بن گیا ہے۔ ذاتی طور پر اس سے مجھے بہتر توجہ مرکوز کرنے میں مدد ملتی ہے اور خاص طور پر ورلڈ کپ کے دوران جو چوٹ لگی تھی اس کے بعد یوگا نے مجھے صحت یاب ہونے میں مدد کی۔ میں یوگا سیشن کے بعد بہت زیادہ پر سکون محسوس کرتا ہوں اور اس سے ہمیں بہتر توجہ مرکوز کرنے میں بھی مدد ملی ہے۔”
ہندوستانی خواتین ہاکی ٹیم کی نائب کپتان نونیت کور نے لوگوں سے درخواست کی کہ وہ اپنی مجموعی صحت کے لیے یوگا کریں۔
کور نے کہا، "یوگا ہمارے ہفتہ وار معمول کا ایک حصہ ہے اور اس نے ہمارے تناؤ کو سنبھالنے میں بہت مدد کی ہے۔ یہ ہمارے جسم کو خاص طور پر بھاری سیشن کے بعد آرام دیتا ہے اور بعض آسن ہماری لچک کو بڑھانے میں مدد کرتے ہیں۔
ہندوستانی خواتین کی ہاکی ٹیم اس وقت اسپین کے دورے سے قبل قومی کوچنگ کیمپ کے لیے یہاں اسپورٹس اتھارٹی آف انڈیا (ایس اے آئی) کے مرکز میں ہے، جب کہ مردوں کی ٹیم یورپ میں اپنی پرو لیگ مہم کے بعد دو ہفتے کے وقفے پر ہے۔ چین میں ہونے والے ایشین گیمز سے قبل اگلے چند ماہ دونوں ٹیموں کے لیے بہت اہم ہیں کیونکہ وہ اپنی اپنی کیٹیگریز میں گولڈ میڈل جیت کر 2024 کے پیرس اولمپک گیمز کے لیے براہ راست کوالیفائی کرنے کی کوشش کریں گی۔
کور نے کہا، "ہم کیمپ میں جتنے بھی سیشنز دیکھتے ہیں، چاہے وہ جم ہو، یوگا ہو، ہاکی کی مہارت کی تربیت ہو، صحت یابی وغیرہ ہو، یہ سبھی ایشیائی کھیلوں کی ہماری تیاریوں میں اہم ہیں۔ ہم اپنے ہر کام میں 100فیصد دینے کی ضرورت محسوس کرتے ہیں۔ ہماری خوش قسمتی ہے کہ ہم ایس اے آئی سنٹر میں پیشہ ورانہ ماحول میں تربیت حاصل کرپارہے ہیں۔
