سسودیا نے مودی کو خط لکھ کر پہلوان بیٹیوں کے لیے انصاف کا مطالبہ کیا

نئی دہلی//شراب گھپلہ معاملے میں جیل میں بند عام آدمی پارٹی کے سینئر لیڈر اور سابق نائب وزیر اعلیٰ منیش سسودیا نے ہفتہ کو وزیر اعظم نریندر مودی کو ایک خط لکھ کر جنتر منتر پر دھرنا دے رہیں ملک کا سر فخر سے بلند کرنے والی پہلوان بیٹیوں کے لئے انصاف کا مطالبہ کیا۔
مسٹر سسودیا نے کہا کہ وزیر اعظم اس واقعہ سے اس طرح منہ موڑ رہے ہیں جیسے یہ بیٹیاں پاکستان سے آئی ہوں۔ وزیر اعظم غیر ملکی سرزمین پر تمغے جیت کر ہندوستان کا نام روشن کرنے والی ان بیٹیوں کو اپنے خاندان کا فرد کہتے نہیں تھکتے تھے ، لیکن اب خاموش ہیں۔ کیا ہر معاملے پر ‘من کی بات’ کہنے والے وزیر اعظم صرف اس لیے خاموش ہیں کہ ملزم ان کی پارٹی کا مضبوط رکن پارلیمنٹ ہے ؟
وزیر اعظم کو لکھے گئے خط میں انہوں نے کہا کہ وزیر اعظم آپ نے کہا تھا کہ بیٹیاں ملک کا فخر ہیں۔ پھر ان بیٹیوں نے واقعی ملک کا سر فخر سے بلند کیا ہے ۔ ان باصلاحیت بیٹیوں کی وجہ سے ہمارا ترنگا غیر ملکی سرزمین پر سربلند ہے ۔ ان کی وجہ سے ہمارا قومی ترانہ بیرون ممالک میں گونج اٹھا ہے ۔ ایک ہندوستانی ہونے کے ناطے میرا خون اُس وقت کھولتا ہے جب وہ بیٹی جو میڈل جیتنے کے بعد اتنی جذباتی ہو گئی، ہندوستان کو فخریہ بناتے ہوئے اس کی آنکھوں سے آنسو نکل آئے ، آج وہ جنتر منتر پر انصاف کے لیے آنسو بہا رہی ہے ۔
سابق ڈپٹی چیف منسٹر نے کہا کہ ہم آپ کے سیاسی مخالف ہیں، آپ نے ہمارا کام روکنے کے لیے آٹھ سال تک آئین کا گلا گھونٹا۔ اپنی تمام ایجنسیوں کو استعمال کرتے ہوئے انہیں جھوٹے الزامات میں جیل بھیج دیا گیا۔ آپ اپنے سیاسی مخالفین کو جیل بھیجیں، ان کو پھانسی دیں، یہ آپ کی سیاست کا طریقہ اور سطح ہو سکتا ہے ، لیکن ان بیٹیوں کو انصاف دیں جو ہندوستان کا سر فخر سے بلند کرتی ہیں، ورنہ کوئی بھی ہونہار بیٹی اس ملک کے کسی بھی طاقتور شخص کے خلاف پھر سے آواز اٹھانے کی ہمت نہیں کر پائیں گی۔
پارٹی کے سینئر لیڈر اور دہلی کے وزیر تعلیم آتشی مارلینا نے مسٹر سسودیا کے ذریعہ لکھے گئے خط کو ٹویٹر پر شیئر کیا اور کہاکہ "منیش سسودیا جیل سے لکھتے ہیں وزیراعظم صاحب آپ اپنے مخالفین کو جیل بھیجیں، انہیں پھانسی دیں۔ لیکن ہندوستان کا سر فخر سے بلند کرنے والی بیٹیوں کو انصاف دیں، ورنہ اس ملک کی کوئی بیٹی آواز اٹھانے کی جرات نہیں کرے گی۔’’