جعلی گنڈولا ٹکٹیں فروخت کرنے میں ملوث دھوکہ باز گرفتار:پولیس

سرینگر//
بارہمولہ پولیس نے سیاحتی مقام گلمرگ میں جعلی گنڈولا ٹکٹوں کو فروخت کرنے میں ملوث دھوکہ باز کو گرفتار کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن گلمرگ کو گلمرگ گنڈولا پروجیکٹ کے منیجر کی طرف سے ایک تحریری شکایت موصول ہوئی جس میں کہا گیا کہ ایک ٹکٹ چیک کرنے والے نے گیارہ سیاحوں کو جعلی گنڈولا ٹکٹوں کے ساتھ پکڑا۔
ترجمان نے کہا’’پوچھ تاچھ پر ان سیاحوں نے بتایا کہ کسی ٹورسٹ گائیڈ انہیں یہ ٹکٹیں دیں‘‘۔پولیس بیان میں کہا گیا کہ اس سلسلے میں پولیس اسٹیشن گلمرگ میں متعلقہ دفعات کے تحت ایک کیس درج کرکے تحقیقات شروع کی گئیں۔
پولیس ترجمان نے کہا’’تحقیقات کے دوران سیاح کا بیان ریکارڈ کیا گیا اور پھر انتہائی کوششوں کے بعد محمد اختر ولد غلام نبی ساکن بانڈی بالا چندوسہ نامی ٹورسٹ گائیڈ کو حراست میں لیا گیا‘‘۔
بولیس ترجمان نے کہا کہ دھوکہ بازوں نے انکشاف کیا کہ وہ گنڈولا ٹکٹین پہلے ہی بک کرتے ہیں اور بعد میں انہیں سیاحوں کو مہنگے داموں فروخت کرتے ہیں۔
سیاحوں سے ایسے دھوکہ بازوں سے ہوشیار رہنے کی تاکید کی گئی ہے ۔