راج ناتھ نے روس، ازبکستان، بیلاروس اور کرغزستان کے وزرائے دفاع کے ساتھ دو طرفہ میٹنگ کی

نئی دہلی// وزیر دفاع راج ناتھ سنگھ نے شنگھائی تعاون تنظیم (ایس سی او) کی میٹنگ سے الگ رکن ممالک روس، ازبکستان، بیلاروس اور کرغزستان کے وزرائے دفاع کے ساتھ الگ الگ دو طرفہ میٹنگیں کیں اور ہندوستان کے ساتھ ان ممالک کے دفاعی امور پر تبادلہ خیال کیا اور خطے میں تعاون کا جائزہ لیا۔
اس موقع پر ازبیکستان کے وزیر دفاع لیفٹیننٹ جنرل بخودیر قربانوف، بیلاروس کے وزیر دفاع لیفٹیننٹ جنرل وکٹر خرینن اور کرغزستان کے وزیر دفاع لیفٹیننٹ جنرل بیک بولوٹوف بی اسانکالیوچ کے ساتھ دو طرفہ ملاقاتیں کیں۔ ملاقاتوں کے دوران تینوں ممالک کے ساتھ دفاعی تعاون کے تمام پہلوؤں کا جائزہ لیا گیا، جس میں دو طرفہ تعلقات کو آگے بڑھانے کے لئے فائدہ مند راستوں کی نشاندہی پر توجہ دی گئی۔ باہمی دلچسپی کے امور پر بھی تبادلہ ٔخیال کیا گیا۔
ایس سی او کے سیکرٹری جنرل ژانگ منگ نے بھی ایس سی او کے وزیر دفاع کی میٹنگ کی تکمیل پر وزیر دفاع سے ملاقات کی۔ ان کی صدارت میں ہندوستان کی طرف سے کی جانے والی مختلف سرگرمیوں پر تبادلہ ٔخیال کیا گیا۔ مسٹر راج ناتھ سنگھ نے سکریٹری جنرل کو مطلع کیا کہ ہندوستان ایس سی او کے مینڈیٹ کے نفاذ میں تعمیری تعاون کرنے کے لئے عہد بستہ ہے ۔