پاسپورٹ دفتر کا خصوصی کیمپ‘۷سو حج عازمین کو پاسپورٹ دئے گئے

سرینگر//
ریجنل پاسپورٹ دفتر نے جمعرات کو سرینگر میں ایک خصوصی کیمپ کے دوران زائد از۷سو حج عازمین کو پاسپورٹ حوالے کئے ۔
اس موقعے پر ریجنل پاسپورٹ آفیسر کشمیر و لداخ‘ دیویندر کمار نے نامہ نگاروں کو بتایا کہ ہم نے یہاں عازمین حج کیلئے ایک خصوصی کیمپ منعقد کرنے کیلئے مرکز سے اجازت طلب کی تھی۔
کمار نے کہا’’ہماری درخواست کو منظور کیا گیا اور آج ہم نے حج کے خواہشمندوں راحت پہنچانے کیلئے اس کیمپ کا انعقاد کیا‘‘۔
زیر التوا پاسپورٹوں کے بارے میں پوچھے جانے والے ایک سوال کے جواب میں ان کا کہنا تھا’’دسمبر۲۰۲۲میں زائد از چھ ہزار کیس زیر التوا تھے جن کی تعداد اس وقت محض۲۵سو رہ گئی ہے ‘‘۔
پاسپورٹ آفیسر نے کہا کہ ماہ مارچ کے اختتام تک ہم اس تعداد کو صفر تک پہنچانے کی کوشش کر رہے ہیں۔ان کا کہنا تھا کہ ہم نے۲۵فروری کو ایک خصوصی مہم کا اہتمام کیا جس میں زائد از چار سو درخواست دہندگان نے شرکت کی۔