سرینگر/۹مارچ
ریجنل پاسپورٹ دفتر نے جمعرات کو سرینگر میں ایک خصوصی کیمپ کے دوران زائد از 7 سو حج عازمین کو پاسپورٹ حوالے کئے ۔
اس موقعے پر ریجنل پاسپورٹ آفیسر کشمیر و لداخ دیویندر کمار نے نامہ نگاروں کو بتایا کہ ہم نے یہاں عازمین حج کے لئے ایک خصوصی کیمپ منعقد کرنے کے لئے مرکز سے اجازت طلب کی تھی۔
کمار نے کہا: ‘ہماری درخواست کو منظور کیا گیا اور آج ہم نے حج کے خواہشمندوں راحت پہنچانے کے لئے اس کیمپ کا انعقاد کیا۔
زیر التوا پاسپورٹوں کے بارے میں پوچھے جانے والے ایک سوال کے جواب میں ان کا کہنا تھا”دسمبر2022 میں زائد از چھ ہزار کیس زیر التوا تھے جن کی تعداد اس وقت محض 25 سو رہ گئی ہے “۔
پاسپورٹ آفیسر نے کہا کہ ماہ مارچ کے اختتام تک ہم اس تعداد کو صفر تک پہنچانے کی کوشش کر رہے ہیں۔ان کا کہنا تھا کہ ہم نے 25 فروری کو ایک خصوصی مہم کا اہتمام کیا جس میں زائد از چار سو درخواست دہندگان نے شرکت کی۔