دہلی میں پاسپورٹ کی تصدیق اب 15 دن میں نہیں، پانچ دن میں ہوگی: شاہ

نئی دہلی// مرکزی وزیر داخلہ امت شاہ نے جمعرات کو کہا کہ پاسپورٹ کی درخواستوں کی تصدیق اب 15 دن کے بجائے پانچ دنوں میں مکمل کی جائے گی۔
امور داخلہ اور امداد باہمی کے مرکزی وزیر امت شاہ نے آج نئی دہلی میں دہلی پولیس کے 76ویں یوم تاسیس کی تقریبات میں بطور مہمان خصوصی شرکت کی۔ اس موقع پر مرکزی وزیر داخلہ نے پاسپورٹ کے ویری فکیشن (تصدیق) کی مکمل آن لائن سہولت کا افتتاح کیا اور دہلی پولیس میں شامل موبائل فارنسک وہیکلس بھی لوگوں کے لیے وقف کیں۔ اس کے ساتھ ہی مرکزی وزیر داخلہ نے نیشنل فارنسک سائنس یونیورسٹی (این ایف ایس یو) دہلی کیمپس کے اکیڈمک کمپلیکس کا بھی افتتاح کیا۔ اس موقع پر مرکزی داخلہ سکریٹری اور دہلی پولیس کمشنر سمیت کئی معززین بھی موجود تھے ۔
اپنے خطاب میں امور داخلہ اور امداد باہمی کے مرکزی وزیر نے کہا کہ آزادی سے لے کر آج تک اپنی شاندار تاریخ کے ساتھ دہلی پولیس نے پورے ملک کی تعریف حاصل کی ہے ۔ انہوں نے کہا کہ دہلی میں کئی ممالک کے سفارت خانے اور بہت اہم لوگوں کی رہائش گاہیں ہیں اور پوری دنیا دہلی پولیس کے سیکورٹی نظام کی تعریف کرتی ہے ۔
مسٹر امت شاہ نے کہا کہ پولیس اور اس کے کام کو آزادی کے فوراً بعد بدلنا چاہیے تھا۔ انہوں نے کہا کہ آزادی سے پہلے پولیس کے کام میں خدمت کا جذبہ شامل نہیں تھا۔ پولیس کا کام داخلی سلامتی اور امن و امان کو برقرار رکھنا اور بنیادی طور پر برطانوی راج کے مفادات کا تحفظ کرنا تھا۔ انہوں نے کہا کہ آزادی کے بعد دہلی پولیس ‘شانتی، سیوا، نیائے ’ کے اصولوں کے ساتھ آگے بڑھی ہے اور اس مقصد میں تبدیلی کے ساتھ دہلی پولیس نے 75 سال کے اس سفر میں اپنے کاموں، سرگرمیوں اور خیالات میں کافی تبدیلیاں کی ہیں۔ انہوں نے کہا کہ حال ہی میں ملک اور دنیا کووڈ-19 کی وبا سے گزری ہے ، اس وقت دہلی پولیس کا انسانی چہرہ سب کے سامنے آیا، جس نے ملک اور دنیا میں اس کی تصویر بدل دی۔
دہلی پولیس کے اہلکاروں نے کووڈ 19 کی وبا کے دوران دہلی کے بوڑھے اور بیمار لوگوں کی دیکھ بھال کی، ان کے خاندان کے افراد کی طرح ان کے ساتھ رہے اور ان کی حفاظت کی۔ دہلی پولیس کے کئی اہلکار خود بھی کووڈ-19 سے متاثر ہوئے اور کئی اہلکاروں نے اپنی جان بھی گنوا دی، لیکن کورونا کی وبا کے خاتمے تک دہلی پولیس ‘شانتی، سیوا، نیائے ’ کے اپنے نعرے کو پورا کرتی رہی۔