روہت کی سنچری، ہندوستان کی برتری 100 رنز سے زیادہ

ناگپور// ہندوستان نے کپتان روہت شرما کی صبر آزما سنچری (120) کے بعد رویندر جڈیجا (66 ناٹ آؤٹ) اور اکشر پٹیل (ناٹ آؤٹ 52) نے جمعہ کو بارڈر-گاوسکر ٹرافی کے پہلے ٹیسٹ کی پہلی اننگز میں آسٹریلیا کے خلاف 144 رنز کی شاندار برتری حاصل کی۔ دوسرے دن کا کھیل ختم ہونے سے قبل ہندوستان نے 321 رنز بنالئے اور میزبان ٹیم کےہاتھ میں اب بھی تین وکٹیں باقی ہیں۔
روہت نے کپتانی اننگز کھیلتے ہوئے 212 گیندوں میں 15 چوکوں اور دو چھکوں کی مدد سے 120 رنز بنائے۔ اس کے ساتھ ہی وہ کھیل کے تینوں فارمیٹس میں سنچری بنانے والے پہلے ہندوستانی کپتان بن گئے۔ تلک رتنے دلشان (سری لنکا)، فاف ڈو پلیسس (جنوبی افریقہ) اور بابر اعظم (پاکستان) بین الاقوامی مردوں کی کرکٹ میں روہت سے پہلے یہ کارنامہ انجام دے چکے ہیں۔
روہت کی وکٹ گرنے کے بعد ہندوستان کی ساتویں وکٹ وکٹ کیپر شریکر بھرت کی صورت میں بھی 240 رنز پر گری۔ آسٹریلیا نے ہندوستان کو ایک چھوٹی برتری تک محدود کرنے کی کوشش کی لیکن جڈیجہ اور اکشر نے آٹھویں وکٹ کے لیے ناٹ آؤٹ 81 رنز کی شراکت قائم کرکے کینگروز کی امیدوں پر پانی پھیر دیا۔
آسٹریلیا کے لیے تاہم، ٹوڈ مرفی کی باؤلنگ سے راحت ملی، جس نے وراٹ کوہلی اور چیتشور پجارا سمیت پانچ بلے بازوں کو آؤٹ کیا۔ اس کے علاوہ کپتان پیٹ کمنز اور نیتھن لیون کو بھی ایک ایک کامیابی ملی۔
ہندوستان کے لیے دن کا آغاز اچھا نہیں تھا کیونکہ ٹوڈ مرفی نے پہلے سیشن میں ہی نائٹ واچ مین روی چندرن اشون (23) اور چیتشور پجارا (7 رنز) کو آؤٹ کر دیا۔ مرفی نے ایشون کو لیگ اسٹمپ کے اندر آنے والی ایک گیند پر ایل بی ڈبلیو کیا، جب کہ پجارا لیگ اسٹمپ کے باہر گیند کو سوئپ کرنے کی کوشش میں شارٹ فائن لیگ پر کیچ ہو گئے۔
لنچ کے بعد بھی مرفی نے محتاط گیند بازی جاری رکھی اور وراٹ کوہلی (12) کو وکٹ کیپر ایلکس کیری کے ہاتھوں کیچ آؤٹ کرا دیا۔
ٹیسٹ کرکٹ میں اپنا ڈیبیو کرنے والے سوریہ کمار یادو زیادہ کچھ نہ کر سکے اور نو رنز کے اسکور پر ناتھن لیون کا شکار ہو گئے۔ تاہم اس کے بعد روہت اور جڈیجہ نے ہندوستانی اننگز کو سنبھالا۔
روہت نے اپنی اننگز کی 171 ویں گیند پر ٹوڈ مرفی کو چوکا لگا کر اپنی سنچری مکمل کی۔ چائے تک روہت-جڈیجہ کے درمیان 58 رنز کی شراکت ہوئی جس نے آسٹریلیا کو بری طرح تھکا دیا۔
تیسرا سیشن شروع ہوتے ہی کمنز نے نئی گیند لے لی۔ سیشن کی تیسری گیند پر روہت کا کیچ چھوٹ گیا لیکن اگلی ہی گیند پر کمنس نے روہت کو بولڈ کرکے اپنی ٹیم کو ایک بڑی کامیابی دلائی۔ کچھ دیر بعد مرفی نے اپنے ہاتھ کھولے اور شریکر بھرت کو ایل بی ڈبلیو آؤٹ کر دیا اور آسٹریلیا مضبوط پوزیشن میں نظر آیا۔ اس وقت تک ہندوستان کی برتری صرف 63 رنز تھی لیکن اس کے بعد جڈیجہ اور اکشر وکٹ پر موجود رہے۔
جڈیجہ نے نو چوکوں کی مدد سے 66 رنز بنانے کے لیے 170 گیندیں کھیلیں، جب کہ اکشر نے 52 رنز کی شراکت میں 102 گیندیں کھیلیں۔ دن کے آخری اوور میں آسٹریلیا کے پاس جڈیجہ کو آؤٹ کرنے کا موقع تھا تاہم سلپ میں اسٹیو اسمتھ کیچ نہ لے سکے اور جڈیجہ-اکشر ناٹ آؤٹ پویلین لوٹ گئے۔