کشمیر میںحالات بدل گئے‘امن و امان لوٹ آیا ہے

نئی دہلی//
وزیر اعظم نریندر مودی نے آج کہا کہ ان کی حکومت جموں کشمیر میں امن و سکون کو یقینی بنانے میں کامیاب رہی ہے جس کے بعد بڑی تعداد میں لوگ خطے کا دورہ کر رہے ہیں۔
کانگریس لیڈر راہول گاندھی پر طنز کرتے ہوئے مودی نے کہا کہ جو لوگ حال ہی میں مرکز کے زیر انتظام علاقے کا دورہ کر چکے ہیں وہ سب کو سازگار ماحول کے بارے میں بتا سکتے ہیں۔
لوک سبھا میں صدر کے خطاب پر بحث کا جواب دیتے ہوئے مودی نے کہا’’ کئی دہائیوں پہلے میں نے جموں و کشمیر کی یاترا بھی نکالی تھی۔ میں نے سرینگر کے لال چوک پر قومی پرچم لہرانے کا عزم بھی کیا تھا۔ دہشت گردوں نے پوسٹر لگا کر ہمیں للکارا، لیکن ہم آگے بڑھے‘‘۔
وزیر اعظم نے کہا کہ وہ دھمکیوں سے نہیں ڈرے اور جموں میں بیان دیا کہ وہ اپنے منصوبوں کو آگے بڑھائیں گے۔
مودی نے کہا کہ آج وہاں پر ماحول تبدیل ہوا ہے، ہر طرف امن و امان کی فضا قائم ہے ، سیاحتی شعبے نے پچھلے کئی دہائیوں کے ریکارڈ توڑے ہیں یہ سب کچھ موجودہ حکومت کی کاوشوں کے نتیجے میں ہی ہوا ہے۔
وزیر اعظم نے کہاکہ آج لالچوک میں ہر کوئی ترنگا لہرا سکتا ہے ، میں اُس وقت کی بات کرتا ہوں جب یہاں پر حالات خراب تھے تو بغیر سیکورٹی ، بغیر بیلٹ پروف گاڑی کے لالچوک میں ترنگا لہرایا۔ انہوں نے کہاکہ جموں وکشمیر میں اب حالات بدل گئے ہیں اور وہاں پر امن و امان واپس لوٹ آیا ہے۔
وزیر اعظم نریندر مودی نے کہا ہے کہ ان کی حکومت کے ذریعہ کئے گئے کاموں سے ملک کے وقار میں اضافہ ہوا بے اور نئے امکانات پیدا ہوئے ہیں۔
مودی نے کہا کہ ہندوستان میں کئے گئے کاموں کی وجہ سے ہم وطنوں کا سینہ چوڑا ہوا ہے اور سب کا سر فخر سے بلند ہوا ہے۔ انہوں نے کہا کہ ان کی حکومت نے ملک اور دنیا کی ساکھ میں اضافہ کیا ہے، فیصلہ کن اقدامات کیے ہیں، عوامی مفاد میں فیصلے کیے ہیں اور تمام اصلاحاتی کام عوامی جذبات کے مطابق کیے ہیں، اس لیے حکومت پر سب کے اعتماد میں اضافہ ہوا ہے۔
وزیر اعظم نے کہا’’ملک بحران کے درمیان بھی فخر سے بھرا ہوا ہے، ملک کے ۱۴۰ کروڑ عوام کے سامنے جو چیلنجز تھے، وہ چیلنجز موجود نہیں رہا، ہندوستان کے لیے نئے امکانات ابھرے ہیں۔ پوری دنیا کی سپلائی چین ٹوٹ گئی لیکن ہم آگے بڑھتے رہے اور اس سے پوری دنیا میں ہمارے ملک کی ساکھ بڑھی‘‘۔
مودی نے کہا کہ کورونا کے وقت دنیا بحران کا شکار تھی لیکن ہندوستان نے اپنی طاقت کے بل بوتے پر اپنے لوگوں کو کورونا سے چھٹکارا دلایا اور ۱۵۰ سے زائد ممالک میں کورونا ویکسین پہنچا کر انسانیت کی خدمت کی۔ ان تمام حالات کو دیکھ کر دنیا امید بھری نظروں سے ہندوستان کی طرف دیکھتی ہے۔ آج ہندوستان جی۲۰ ممالک کی صدارت کر رہا ہے جس کی وجہ سے اہل وطن فخر محسوس کر رہے ہیں۔ ہندوستان دنیا کے معاملے میں مثبت موقف اختیار کرتا ہے اور اسی کا نتیجہ ہے کہ آج ملک اور بیرون ملک ہندوستان سے دنیا کی امیدیں بڑھ گئی ہیں۔
وزیر اعظم نے کہا کہ گزشتہ نو سالوں کے دوران ملک میں نئے امکانات پیدا ہوئے ہیں۔ ٹیکنالوجی کے شعبہ میں اور ایک مینوفیکچرنگ مرکز کے طور پر ابھرا ہے۔ ہندوستان نوجوانوں کی طاقت کی پہچان بن گیا ہے۔ ہندوستان موبائل مینوفیکچرنگ کے میدان میں دنیا کا دوسرا بڑا ملک بن گیا، گھریلو ایئر لائن کے میدان میں دنیا کا تیسرا، توانائی کے استعمال کے معاملے میں دنیا کا تیسرا، سولر ونڈ انرجی کے میدان میں چوتھا مقام حاصل کیا ہے۔
مودی نے کہا ’’کھیلوں کے میدان میں ہندوستان کا پرچم لہرارہا ہے اور چار کروڑ سے زیادہ بچوں نے اعلیٰ تعلیم میں داخلہ لیا ہے۔ یہ ملک کی وہ کامیابیاں ہیں جو نو سال میں حاصل کی گئی ہیں‘‘۔