میسی-رونالڈو کا عرب سرزمین پر ٹاکرا، خصوصی ٹکٹ ایک کروڑ ریال میں فروخت

ریاض//
دنیائے فٹبال کے عصرِ حاضر کے عظیم کھلاڑی لیونل میسی اور کرسٹیانو رونالڈو عرب سرزمین پر پہلی مرتبہ آمنے سامنے آرہے ہیں۔ اس میچ کا خصوصی ٹکٹ ایک کروڑ ریال میں فروخت ہوا ہے۔
عرب میڈیا کی رپورٹ کے مطابق ریاض میں پیرس سینٹ جیرمین اور سعودی کلب الہلال اور النصر کے کھلاڑیوں پر مشتمل ٹیم کے درمیان دوستانہ میچ کھیلا جائے گا۔
اس دوستانہ میچ کی منفرد اور خصوصی ٹکٹ کی پچھلے 10 روز سے بولی لگائی جارہی تھی۔
اس بولی کا آغاز سعودی تاجر عبدالعزیز بغلف نے 25 لاکھ ریال سے کیا تھا، بولیاں لگنے کے بعد بلآخر سعودی تاجر مشرف الغامدی نے یہ ایک کروڑ ریال (تقریباً 61 کروڑ پاکستانی روپے) میں خرید لی۔
ادھر انٹرٹینمنٹ اتھارٹی کے سربراہ ترکی آل الشیخ نے اپنے ٹوئٹر اکاؤنٹ پر ٹکٹ خریدنے والے اس تاجر کو مبارکباد پیش کی۔
بتایا جارہا ہے کہ اس خصوصی ٹکٹ کی پوری قیمت خیراتی تنظیم احسان کے حوالے کردی جائے گی۔
خیال رہے کہ رونالڈو اس وقت سعودی کلب النصر کا حصہ ہیں جبکہ میسی پیرس سینٹ جرمین کے اہم رکن ہیں۔