پاکستان :عمران خان کی حکومت اکثریت سے محروم

سرینگر/۳۰ مارچ(ندائے مشرق ویب ڈیسک)
پاکستان میں عمران خان کی قیادت والی حکومت اکثریت سے محروم ہو گئی ہے۔ متحدہ قومی مومنٹ نے اپوزیشن اتحاد کا ساتھ دینے کا اعلان کیا ہے ۔
پاکستان کے ’جنگ‘ کی ایک رپورٹ میں کہاگیا ہے کہ حکومتی اتحادی ایم کیو ایم کی جانب سے اپوزیشن کی حمایت کے بعد وزیراعظم عمران خان کی حکومت نے قومی اسمبلی میں اکثریت کھودی ہے، حکومت کے قومی اسمبلی میں نمبر ۱۷۴ رہ گئے جبکہ متحدہ اپوزیشن کے نمبر۱۷۷ تک پہنچ گئے۔
رات گئے اپوزیشن رہنما پارلیمنٹ لاجز پہنچے۔ جہاں ان کی ایم کیو ایم رہنمائوں سے ملاقات ہوئی۔
اپوزیشن ذرائع کے مطابق ایم کیوایم تحریک عدم اعتماد میں اپوزیشن کا ساتھ دیگی۔ مولانا فضل الرحمٰن نے بھی اس بات کی تصدیق کی ہے کہ ایم کیو ایم سے اپوزیشن کا معاہدہ طے پا گیا ہے، جس کا باضابطہ اعلان آج کیا جائیگا۔
پیپلزپارٹی کے چیئرمین بلاول بھٹو کا کہنا ہے کہ متحدہ اپوزیشن اور ایم کیوایم کے درمیان معاہدہ ہوچکا ہے، ایم کیوایم کی رابطہ کمیٹی اور پی پی پی کی سینٹرل ایگزیکٹو کمیٹی مذکورہ معاہدے کی توثیق کریں گی، جسکے بعد ہم انشاء اللہ آج میڈیا کو پریس کانفرنس میں تفصیلات بتائیں گے۔مبارک ہو پاکستان۔
پیپلزپارٹی کے فیصل کریم کنڈی کا بھی کہنا ہے کہ معاہدے کے حوالے اپوزیشن رہنما آج شام چار بجے پریس کانفرنس کرینگے۔
رات گئے حکمراں جماعت پی ٹی آئی کے رہنما پرویز خٹک اور شاہ محمود قریشی نے بھی ایم کیو ایم کی قیادت سے ٹیلی فونک رابطہ کیا۔
اسٹاف رپورٹر کے مطابق ایم کیو ایم اور اپوزیشن کے درمیان منگل کی رات گئے کئی امور طے پاگئے ہیں، جسکے بعد ایم کیو ایم نے متحدہ اپوزیشن کو تحریک عدم اعتماد میں اپنی حمایت کا یقین دلادیا ہے۔
قبل ازیں اسلام آباد کے پارلیمنٹ لاجز میں ہونے والے تحریری معاہدے پر اپوزیشن رہنمائوں نے مکمل حامی بھرتے ہوئے کہا تھا کہ ایم کیو ایم کے ساتھ معاہدے پر پورا عمل کیا جائیگا۔