پلوامہ اور شوپیاں میں چار جنگجو گرفتار‘اسلحہ و گولہ بارود ضبط:پولیس

سرینگر//
پولیس نے پیر کو جنوبی کشمیر کے پلوامہ ضلع میں جیش محمد کے دو عسکریت پسندوں کو گرفتار کرنے کا دعویٰ کیا ہے۔
پولیس نے کہا کہ پلوامہ میں پولیس نے فوج اور سی آر پی ایف کے ساتھ مل کر جنگجو تنظیم جیش محمد کے دو جنگجو ساتھیوں کو گرفتار کیا۔ ان کی شناخت عدنان شفیع بٹ ولد محمد شفیع بٹ ساکنہ اشمندر اور یاور رشید شیخ ولد عبدالرشید شیخ ساکن کریم آباد کے طور پر ہوئی ہے۔
پولیس ترجمان کے مطابق ملزمان کے قبضے سے ایک پستول‘ ایک میگزین اور ۱۲ راؤنڈز سمیت اشتعال انگیز مواد، اسلحہ اور گولہ بارود برآمد کیا گیا۔ دوران تفتیش ان کے انکشاف پر۲ دستی بم بھی برآمد ہوئے۔
بیان کے مطابق گرفتار دونوں عسکریت پسند تنظیم جیش محمد کے ساتھیوں کے طور پر کام کر رہے تھے اور انہیں علاقے میں غیر مقامی مزدوروں پر حملے کرنے کا کام سونپا گیا تھا۔
اسی مناسبت سے ایف آئی آر نمبر۳۱۲/۲۰۲۲ کے تحت قانون کی متعلقہ دفعات کے تحت پولس اسٹیشن پلوامہ میں مقدمہ درج کرکے تفتیش شروع کردی گئی ہے۔
اس دوران پہاڑی ضلع شوپیاں کے چیک کیلر علاقے میں فوج نے دو ملی ٹینٹوں کو اسلحہ وگولہ بارود سمیت حراست میں لینے کا دعویٰ کیا ہے ۔
دفاعی ترجمان نے بتایا کہ مصدقہ اطلاع موصول ہونے کے بعد سیکورٹی فورسز نے چیک کیلر کے نزدیک ناکہ لگایا جس دوران گاڑی میں سوار دو افراد کو رکنے کا اشارہ کیا گیا۔انہوں نے بتایا کہ ناکہ پارٹی کو دیکھتے ہی گاڑی میں سوار افراد نے فرار ہونے کی کوشش کی تاہم فوج نے پیشہ وارانہ صلاحیتو ں کو بروئے کار لا کردونوں کو زندہ گرفتار کیا۔
ترجمان کے مطابق جامہ تلاشی کے دوران گرفتار شدگان کے قبضے سے کچھ اسلحہ وگولہ بارود برآمد کرکے ضبط کیا گیا۔انہوں نے بتایا کہ گرفتار شدگان کی شناخت گوہر منظور اور عاقب حسین ساکن دربگام پلوامہ کے بطور ہوئی ۔ترجمان نے بتایا کہ دونوں کو پولیس کے حوالے کیا گیا۔