جموں ریلوے اسٹیشن پر تلاشی آپریشن شروع

جموں//
سیکورٹی فورسز نے جموں ریلوے اسٹیشن کے اندر اور گرد وپیش جمعے کو بڑے پیمانے پر تلاشی آپریشن شروع کر دیا ہے ۔
بتادیں کہ سیکورٹی فورسز نے جمعرات کو اس ریلوے اسٹیشن کے نزدیک۱۸ڈٹونیٹر اور پانچ سو گرام ممنوع اشیاء برآمد کیا تھا۔
ذرائع نے بتایا کہ ریلوے پولیس اور ریلوے پروٹیکشن فورس (آر پی ایف) کے اہلکاروں نے جمعے کے روز جموں ریلوے اسٹیشن کے اندر اور گرد و پیش تلاشی آپریشن چلایا۔انہوں نے کہا کہ سیکورٹی فورسز اہلکاروں نے ریلوے پلیٹ فارم اور پارکنگ علاقے میں بھی تلاشی آپریشن چلایا۔
ذرائع نے بتایا کہ سیکورٹی فورسز اہلکاروں نے گاڑیوں اور ریل کی بھی تلاشی کی۔انہوں نے کہا کہ ریلوے پٹری پر گشت کو بڑھا دیا گیا ہے اور سراغ رساں کتوں کو بھی کام پر لگا دیا گیا ہے ۔
لوگوں سے بھی کہا گیا ہے کہ وہ مشکوک افراد کی نقل و حمل پر نظر گذر رکھیں۔