پی وی سِندھو نے پہلی بار سوئس اوپن خطاب جیتا

سابق عالمی چیمپیئن پی وی سندھو نے تھائی لینڈ کی بوسانن اونگبامرنگفام کو شکست دے کر پہلی بار سوئس اوپن سُپر 300 بیڈمنٹن ٹورنامنٹ کا خواتین سنگلز کا خطاب جیتا۔دفاعی رنر اپ پی وی سِندھو نے فائنل میں بوسانن کو 21-16، 21-8 سے شکست دے کر سُپر 300 کا خطاب اپنے نام کیا۔ دو بار کی اولمپک میڈلسٹ سِندھو نے یہ میچ جیت کر بوسانن کے خلاف اپنے ریکارڈ کو 16-1 بہتر کیا۔ جنوری میں سید مودی انٹرنیشنل جیتنے کے بعد سِندھو کا یہ سال کا دوسرا ٹائٹل ہے۔پی وی سِندھو نے ابتدائی گیم کے پہلے ہاف میں زبردست شروعات کی۔ جس میں سندھو نے کھیل کے درمیانی وقفے تک 11-9 پر دو پوائنٹس کی برتری حاصل کرلی۔ بوسانن نے وقفے کے بعد معمولی برتری حاصل کی لیکن بھارتی شٹلر نے جلد واپسی کرتے ہوئے اسکور کو 13-13 سے برابر کر دیا حالانکہ اس دوران سخت مقابلہ جاری رہا لیکن سندھو آخر کار تین پوائنٹ کی برتری حاصل کرنے میں کامیاب ہو گئیں۔ تاہم بوسانن کو جلدی سے ایک پوائنٹ مل گیا لیکن سندھو نہیں رکیں اور تیز طرار شاٹس سے انہوں نے پہلا گیم 21-16 سے جیت لیا۔دوسرے گیم میں سِندھو جارحانہ انداز میں نظر آئیں اور 8-1 کی برتری حاصل کر لی تھی اور فوری بعد اسکور 11-2 کر کے حریف سے 9 پوائنٹس آگے نکل گئیں۔ وقفے کے بعد سندھو نے 14-4 کی برتری کے ساتھ کھیل پر کنٹرول کرنا جاری رکھا اور بوسانن کے لیے واپسی ناممکن کر دی۔ سندھو کے غلبے نے بوسانن پر دباؤ ڈالا۔ اس کے نتیجے میں بوسانن نے بہت سی غلطیاں کیں جس کی وجہ سے سندھو کو دوسرا گیم 21-8 سے آسانی سے جیتنے میں مدد ملی۔