صاحب کوئی ہمیں بھی سمجھائے کہ آخر یہ ہو کیا رہا ہے ؟نہیں صاحب جو ہورہا ہے ‘ اسے یونہی ہونے نہیںدیا جا سکتا ہے اور…اور بالکل بھی نہیں دیا جا سکتا ہے… اسے روکنا ہو گا آج اور ابھی روکنا ہو گا کہ … کہ بات انسانی زندگیوں کی ہے… جو آئے روز سڑک حادثوں کی نذر ہو رہی ہیں … ابھی کل ہی‘بدھ کو ہی پونچھ میں کم و بیش ایک درجن لوگ سڑک حادثے میں ہلاک ہو گئے … ابھی اس حادثے میں ہلاک ہونے والوں میں سے کئی ایک کی آخری رسومات بھی انجام نہیں دی گئی تھیں کہ … کہ آج راجوری میں میں ہوئے ایک اور سڑک حادثے میں آدھے درجن لوگ مارے گئے ہیں… ایسا لگ رہا ہے کہ جموں کشمیر میں سڑک حادثوںکا کوئی مقابلہ چل رہا ہے… لگتا ہے کہ ایک دوڑ سی لگی ہو ئی ہے … سڑک حادثوں کی دوڑ جس میں ہر ایک شامل ہونا چاہتا ہے …خاص کر چناب اور پیر پنچال رینج میں …ڈوڈہ‘ راجور ی اور پونچھ میں نہ صرف ہول سیل میں حادثے ہو رہے ہیں… بلکہ ان میں لوگ بھی ہول سیل میں مررہے ہیں…کیوں مررہے ہیں‘ ہم نہیں جانتے ہیں… کہ … کہ اگر ہم کچھ جانتے ہیں تو یہ کہ یہ حادثے … جان لیوا حادثے اظہار تعزیت کے پیغامات اور … اور نہ مارے گئے افراد کے لواحقین کے حق میں مالی امداد منظور کرنے سے رک سکتے ہیں… انتظامیہ کا رول صرف ایکس گریشیا ریلیف کی ادائیگی یا منظوری تک ہی محدود نہیں ہے… محدود نہیں ہو نا چاہیے‘محدود نہیں ہو سکتا ہے… حادثے کیوں ہو رہے ہیں‘ اتنے تواتر کے ساتھ کیوں ہو رہے ہیں‘ اس بات کا پتہ لگا کر ‘تدارکی اقدامات اٹھا کر … جو کوتاہیاں اور خامیاں سامنے آئیں گی انہیں ایڈریس کرنے سے ہی سڑک حادثے اور ان حادثوں میں قیمتی انسانی جانوں کے ضیاع کو روکا جا سکتا ہے… روکا جانا چاہئے ۔ جموں کشمیر ایک چھوٹی نہیں بلکہ بہت چھوٹی سی جگہ ہے اور… اور اس چھوٹے موٹے علاقے میں سالانہ دس بارہ سو افراد کی سڑک حادثات میں موت واقعی میں کوئی چھوٹی موٹی بات نہیں ہے اور… اور بالکل بھی نہیں ہے ۔اس لئے صاحب اس سے پہلے کہ حادثات مزید لوگوں کی جان لیں ‘ گھروں کو اجاڑ دیں … ہنگامی نہیں بلکہ جنگی اقدامات کی ضرورت ہے اور… اور ہمیں یقین ہے … ایک سو فیصد یقین ہے کہ انتظامیہ اقدامات اٹھائیگی… فوری طور پر اٹھائے گی ۔ ہے نا؟
سڑک حادثات :اِک دوڑ سی لگی ہے
